The Definitive Guide to Living in the Capital , Cairo , Egypt

من الحاجات الجميلة في القاهرة ومصر عمومًا أن الوعي الرياضي بـ ينتشر والشباب بقوا دلوقت يحبوا يعملوا حاجات جديدة ويكتسبوا مهارات ويعملوا تحديات جديدة زي رياضات كثيرة منها المشي في الجبالHiking  وتسلقها ومهارات البقاء في الصحراء والغوص والكاياك والتجديف وغيره، أكيد طبعًا مع تحديات السفر اللي بقيت منتشرة جدًا وخصوصًا السفر لوحدك وبأقل التكاليف.

أصحابنا اللي بـ يعرفوا يركبوا عجل كثير جدًا وفيه منهم اللي بيعرف يسوقه من زمان، مش بس كده دول بيغيظونا أنهم بييجوا المكتب بالعجلة أو بـ يسافروا بها، إحنا ما بنسكتش لأننا برضه أبطال في ركوب العجل بس في الجيم وبنغيظهم.

حد من أصحابنا كلمنا عن شباب اسمهمBe Cyclist  وهم مبادرة ومجموعة لتعليم ركوب العجل لكل الأعمار ولكل الناس (بنات، أولاد، أطفال، ناس كبيرة… أي حد ممكن يتعلم).

Be Cyclist بـ ينظموا إيفنتات لتعليم ركوب العجل مجانًا، بتدفعوا بس مقابل تأجير العجلة 10 جنيه، وممكن تتعلموا Private في اليوم والميعاد اللي يناسب المدرب والمتدرب، وتقدروا تعرفوا أكثر من خلال التواصل معاهم من خلال الصفحة على الفيسبوك، ومن الحاجات الجميلة والمميزة في Be Cyclist هي جملة "اتعلم ركوب العجل في يوم"، نعم؟! إزاي إن شاء الله، يوم واحد؟!

هـ تلاقوا على صفحتهم أكثر من موضوع بيتكلم عن إزاي تتعلم في يوم واحد والاستعداد النفسي والبدني علشان تقدروا تتعلموا ركوب عجل، وإزاي تتفادوا الإصابات أثناء التعليم، وقد إيه أن الموضوع سهل وبسيط.

بكل حماس ولياقة روحنا علشان نتعلم، قابلنا كابتن محمد المصري من فريق Be Cyclist وهو من أبطال رياضة الترايثلون (لعبة عبارة عن سباق سباحة وجري وعجل مع بعض)، ومن الناس المليانين إيجابية وطاقة ونشاط، ملينا Application فيه كام سؤال ظريف عن ركوب العجل وتوقعاتنا لليوم، بعد كده بدأنا التمرين.

فريق Be Cyclist  ابتكروا برنامج سهل للتعليم اسمه BPF (Balance – Pedal – Final)، وهو برنامج بـ يعتمد على مبادئ فيزيائية تساعد على التوازن وسرعة وسهولة التعليم، علشان تتعلموا ركوب العجل في يوم واحد ده له أكثر من دور، لكن على حسب كلام كابتن محمد وفريق Be Cyclist أن التغذية والملابس والكوتشي والتركيز في كلام المدرب بيفرقوا في سرعة التعلم.

لو قدرتم تتعلموا في يوم واحد، هـ يكون لكم مكافأة وهي شارة التعلم اللي تقدروا بعدها تركبوا عجل عادي لوحدكم وسط المرور والعربيات، أما بقى لو كنتم من الناس اللي هتحتاج يوم ثاني أو ثالث هتاخذوا ورقة فيها الغلطات اللي عملتوها في أول يوم علشان تتجنبوها، وتيجوا يوم ثاني تطبقوا أمام المدرب ويسلمكم شارة التعلم.

يوم جميل قضيناه في تعليم واحدة من أحلى الأنشطة وهو ركوب العجل، التجربة تستاهل وإحساس مختلف خالص لما تتعلموا وتقدروا تبدلوا لوحدكم بدون أي مساعدة وفي منتهى التوازن وإحساس أنكم طايرين، كمان أكيد الإحساس أحلى كثير ومختلف لما تطلعواRide  أو تسافروا بالعجلة.

تقدروا تعرفوا أكثر عن Be Cyclist وأنشطتهم والفعاليات اللي بينظموها من خلال متابعة الصفحة على الفيسبوك.. نشوفكم في الـ Ride الجاية.