waleed Abou El Seoud
في السنين الأخيرة قدر الممثل آسر ياسين يحجز لنفسه مكانة مميزة في السينما المصرية، ومن أول مشهد له على الشاشة دخل قلوب المصريين بسبب شكله المصري الخالص اللي حسس الناس إنه صاحبهم أو أخوهم أو زميلهم في الجامعة.
آسر قدر يطور من نفسه، ويوصل بسرعة للقمة ويبقى واحد من نجوم الصف الأول، قابلنا آسر ياسين واتكلم معانا عن القاهرة، وأكله المفضل ومشاريعه الفنية.
ليه بتحب القاهرة؟
القاهرة بتشبهني في حاجات كتير، مدينة صاخبة لا تنام أبدًا، وفي الوقت اللي بعض سكانها بيكونوا نايمين بيكون فيه ناس تانية سهرانة في شوارعها وهكذا، يعني ناس بتسلم ناس مهمة جعل العاصمة دايمًا حية وصاحية. وأنا شخصيًا بحب الحياة والحركة، وبنام عدد ساعات قليل جدًا، وبحس إن وقت نومي وقت ضايع.
إيه الأماكن المفضلة ليك في القاهرة؟
المعادي هي عشقي الحقيقي، بحب اتمشى في شوارعها، بحب كمان الزمالك وأماكنها الجميلة، وطبعًا الكوربة، وكتير بحب أروح وسط البلد.
ولما بتخرج مع أصحابك؟
فيه أماكن كتير بحب أروحها مع أصحابي، ولما بتطلب معانا أكل بحب أكل كبدة أو سجق من “زيزو” في الحسين، كمان بستمتع جدًا بالأكل عند “أبو رامي” في مدينة نصر، الأماكن دي بحس فيها بجمال الأكل وإني واخد راحتي بعيدًا عن جو العمل والتصوير.
والفن؟
أنا بعشق التمثيل، هو شغفي وحياتي، ورغم إني دارس هندسة ميكانيكا في الجامعة الأمريكية لكن حبي للفن خدني من أي حاجة تانية، حاليًا ما بتخيلش نفسي حاجة تانية غير ممثل.
كنت متوقع نجاح مسلسل 30 يوم؟
تجربتي في 30 يوم بعتبرها تجربة مميزة جدًا، وكنت واثق من نجاحه لأسباب كتير منها إن كل عناصر النجاح كانت متوفرة فيه، وكل فرد في المسلسل ده اشتغل بضمير وبحب، عملنا كل مجهودنا علشان المسلسل يطلع بالصورة دي.
كل عناصر المسلسل كانت مميزة، سواء التأليف اللي قام بيه مصطفى هاشم، أو الإخراج لحسام علي، وكل الأبطال عملوا اللي مطلوب منهم على أكمل وجه، زي باسل خياط وإنجي المقدم ونجلاء بدر ووليد فواز، وباقي الأبطال وحقيقي فرحان إن المسلسل عجب الناس.
الجانب النفسي في المسلسل كان صعب؟
المسلسل فيه بعد نفسي صعب جدًا، وأنا اللي قمت بترشيح صديقة ليا متخصصة في علم النفس اسمها جورجيت علشان تكون مستشارة المسلسل كله من الناحية النفسية، وكان هدفنا إن كل التفاصيل تظهر بشكل سليم وعلمي.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
