The Definitive Guide to Living in the Capital , Cairo , Egypt

أسماء كتير من الفنانين لمعت في 2018. وقدموا أدوار مختلفة  في أعمال متنوعة. وإحنا في كايرو 360 قررنا نسلط الضوء على أفضل 10 منهم. ياتري مين هم؟

1- آسر ياسين

واحد من النجوم اللي أثبتوا براعة تمثيلية كبيرة في 2018. ويكفيه دوره المميز في فيلم “تراب الماس”، عن الرواية الشهيرة لأحمد مراد بنفس الاسم. مش قادرين ننسى مشهد نوبة الصرع في الفيلم، اللي أداه ببراعة منقطعة النظير.

2- محمد ممدوح

تميز محمد ممدوح (تايسون) مكانش في 2018 بس. الحقيقة أن كل أدواره ممتازة جدًا. قدر يبعد عن حصر المخرجين له في أدوار معينة، بسبب تكوينه الجسدي. وقدر يقدم مستويات مختلفة من الأداء، في كتير من الأعمال السينمائية والتليفزيونية. ودوره في فيلم تراب الماس يشهد على ده.

3- أكرم حسني

الصاروخ الكوميدي المنطلق بأقصى سرعة. مجرد وجود اسمه على أفيش فيلم أو مسلسل، يعتبر ضمان لصريخ من الكوميديا والضحك المتواصل. في فيلم البدلة ومسلسل الوصية، قدر أكرم يقدم أدوار ممتازة وكوميديا من العيار الثقيل.

4- ظافر العابدين

أداء هادي وواثق من نفسه. اهتمام بكل جملة حوارية وكل مشهد. كلها عوامل ساعدت في اختيارنا لظافر العابدين، كواحد من أفضل الفنانين في 2018. خاصة بعد مشاركته في المسلسل القوي “ليالي أوجيني”. اللي قدر يقدم من خلاله شخصية مركبة، فيها تناقضات كتيرة أظهرت قدراته التمثيلية.

5- ياسر جلال

صاروخ فني مش بيعرف الهبوط أبدًا.. هو ده ملخص التاريخ الفني لياسر جلال، اللي أعاد اكتشاف نفسه من خلال الأعمال اللي قدمها في آخر سنتين. دوره في مسلسل “رحيم” يعتبر تأكيد على أنه نجم كبير، قادر يحفر مكانه بقوة في عالم النجوم المصرية والعربية.

6- أمير كرارة

نجم أكشن صاعد بقوة الصاروخ. بيأكد في كل دور يلعبه، أنه فنان مجتهد وبيشتغل على نفسه. مش بس علشان يطور قدراته العضلية والجسدية، لكن كمان قدراته التمثيلية والفنية.

7- ماجد الكدواني

بدون مبالغة. ماجد الكدواني واحد من أنجح وأفضل الفنانين في مصر والعالم العربي. مش بس في 2018، لكن على مستوى تاريخه الفني بالكامل. في كل دور بيلعبه، الكدواني بيأكد على قدراته غير العادية على تجسيد أي دور يُسند له. سواء كبير أو صغير، أو حتى إعلان. الكدواني (جوكر) حقيقي بيسد في أي مكان يتحط فيه.

8- عمرو عبد الجليل

من الكوميديا للدراما. ممثل شامل قادر يتنطط بين مستويات الأداء المختلفة بسهولة وبراعة. ناهيك أنه اتربي فنيًا على إيد عملاق بحجم يوسف شاهين. كل العوامل دي بروزت أداء عمرو عبد الجليل في مسلسل “طايع” في 2018

9- باسل خياط

مسلسل “الرحلة” اللي اتعرض في 2018، مش بس قدم لنا الممثل الرائع باسل خياط. ده كمان عرفنا على أبعاد مختلفة، يقدر باسل يقدم بيها شخصياته. واللي بتتميز بأنها أدوار مركبة وصعبة جدًا.

10- أحمد أمين

أمين موهبة كوميدية كبيرة. قادر على أنه يحول أي موقف يحصل قدامه لحالة ضحك هستيرية. ومشاركته في مسلسل “الوصية”، كانت تأكيد على كونه كوميديان بيلعب في منطقة خاصة جدًا، هو اللي ابتكرها لنفسه.