The Definitive Guide to Living in the Capital , Cairo , Egypt

مواليد الثمانينيات عاشوا تجربة رائعة اختفت حاليًا، وهي الاستماع للأغاني من خلال شريط بيتحط في جهاز كاسيت. ومصطلحات زي “الهيد عاوز يتنضف” كانت منتشرة لحد نهاية التسعينيات بدرجة كبيرة في مصر. النهارده شريط الكاسيت اختفى وبقينا بنسمع الأغاني بطرق تانية، أشهرها الدخول على يوتيوب وساوند كلاود، وأكشاك بيع شرائط الكاسيت اختفت من عالمنا.

لكن واضح إن فيه ناس لسة عندها حنين كبير لأيام شرائط الكاسيت، ويمكن للسبب ده ظهر نادي الكاسيت، وهو عبارة عن تجمع لعشاق الموسيقى حوالين جهاز كاسيت، علشان يسمعوا الأغاني اللي بيحبوها بنفس طريقة زمان.. عن طرائق شرائط الكاسيت بتاعة الثمانينات والتسعينيات. تعالوا نتعرف أكتر على نادي الكاسيت ونعرف إيه هي فعالياته.

يوم الجمعة 22 يوليو الجاري، وبالتحديد الساعة 6 مساءً، هيتجمع مجموعة من عشاق الموسيقى في مصر الجديدة، من خلال فعالية بيقدمها “نادي الكاسيت”، اللي هدفه الأساسي هو جمع كل اللي بيعشقوا فكرة شرائط الكاسيت بتاعة زمان، وفي اليوم ده، هيتم اختيار شريط بيتسمع على كاسيت، في محاولة للعودة لروح الماضي الجميل.

نادي الكاسيت بيرحب بكل اللي نفسهم يسمعوا الأغاني من تاني من خلال شرائط الكاسيت، وتقدروا أنكم تشاركوا في الحفلة اللي جاية بأنكم تملوا إستمارة تعريف بيكم والموسيقى اللي بتحبوها، وطرق التواصل، وبيكون سعر تذكرة الحضور 50 جنيه.

نادي الكاسيت بيقدم فعاليات مميزة بشكل مستمر، والنادي ده تابع لصفحة فيسبوك اسمها حسب الله السابع عشر.

تقدروا تعرفوا أكتر عن أحدث فعاليات نادي الكاسيت من هنا.