Cairo 360
إعلان مستشفي (500 500) لعلاج الأورام والتابعة للمعهد القومي للأورام الجديد للسوبر ستار محمد حماقي، نقدر نقول عنه بكل بساطة إنه أفضل إعلان خلال شهر رمضان من لحظة نزوله لحد النهارده، والدليل على كده دخول الإعلان لـ “ترند” فيديوهات اليوتيوب، وتحقيقة لأكتر من 2 مليون مشاهدة خلال 9 أيام بس.
نجاح الإعلان ده ووصوله للترند بالسرعة دي كان ليه أسباب كتير جدًا، بتبتدي بمشاركة حقيقة لبطل الإعلان الطفل ” محمد أحمد الإمام” اللي قعد يحارب السرطان لمدة 4 سنوات، ده غير تصويره اللي تم فعليًا في موقع مستشفى (500 500) قيد الإنشاء، وجت فكرة تصويرة في الموقع علشان توضح إيه اللي تم إنجازه من أعمال و إنشاءات خلال الفترة اللي فاتت، ده غير طبعًا كلمات الأغنية اللي كتبها المبدع “أمير طعيمة” ولحنها العبقري “عمرو مصطفى” وبتدور حوالين التفاؤل والبهجة لإنجاز المستشفى في أسرع وقت.
الفنان “محمد حماقي” قدر يوصل لنا إحساس التفاؤل والبهجة ده على مدى 3 دقايق ونص تحس إنهم 3 ثواني من الاستمتاع، ده غير إن الإعلان ضم مجموعة كبيرة جدًا من الفنانيين من أجيال مختلفة، من أول الفنانة القديرة رجاء الجداوي، ويسرا وليلى علوي وإنجي المقدم وهنا وحلا شيحة، ومي عمر، وآسر ياسين وعمرو يوسف، وإياد نصار، وغيرهم كتير، ده غير فرقة وسط البلد وعدد كبير من الرياضيين و الكتاب و مشاهير السوشيال ميديا واللي كلهم اتطوعوا للظهور في الإعلان ده بهدف توجيه الدعم والحب سواء لبناة المستشفى أو للمتبرعين ليها أو للمرضى اللي هيتعالجوا فيها .
الجميل في الإعلان، هوه إنه أظهر قدرة القائمين على المستشفى على تحقيق معادلة صعبة جدًا، وهي توصيل رسالة تفاؤلية ووجود الأمل علشان نحقق حلم بناء أكبر مستشفي للأورام في العالم قائمة علي التبرعات، وفي نفس الوقت بدون ما يدخل المشاهد في أجواء الحزن والدموع علشان يشجعه علي التبرع، وده في حد ذاته إنجاز جميل ومحسوس أوي في الإعلان.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
