The Definitive Guide to Living in the Capital , Cairo , Egypt

مش هنبقى بنبالغ لو قلنا إن الإقبال على حي “جاردن سيتي” هيكون تاريخي بعد ما نقولكم الخبر الجميل ده، وهو إن الدكتورة “إيناس عبد الدايم” وزيرة الثقافة افتتحت مؤخرًا متحف “قصر السينما” في “جاردن سيتي” علشان يبقى أول مكان في القاهرة شاهد على رحلة السينما وتطوراتها في أم الدنيا.

المتحف بيضم عدد من المقتنيات السينمائية النادرة اللي بتنتمي لفترة الخمسينيات والستينيات، واللي استخدمها فعلًا مخرجين مصريين كبار في عمليات تصوير ومونتاج أشهر الأفلام السينمائية المصرية، زي كاميرات 35 مللي و16 مللي وأجهزة صوت وجهاز تليسين، وعدسات متنوعة، وكاميرات فوتوغرافية قديمة، وآلات عرض سينمائية نادرة اتعرضت بيها أشهر أفلام السينما المصرية واللي شارك فيها عدد كبير من نجوم السينما زي “إسماعيل يس” والفنانة “فاتن حمامة” و”عمر الشريف” و”نور الشريف” وغيرهم.

مدير قصر السينما الفنان “تامر عبد المنعم” قال في حوار ليه مع صحيفة “الشرق الأوسط” عن فكرة إنشاء متحف سينمائي، إن “قصر السينما” بيمتلك عدد مميز من المعدات السينمائية القديمة والنادرة، ده غير الأفيشات الأصلية لأبرز أفلام السينما المصرية على مدار تاريخها، زي “السفيرة عزيزة” و”نحن لا نزرع الشوك” و”بائعة الخبز” و”مسجل خطر” و”العار” و”ألف ليلة وليلة” و”الراعي والنساء” و”الرجل الذي فقد ظله” و”أولاد الأصول”، وعلشان كده جت فكرة استغلال الحاجات دي بشكل يليق بقيمتها زي الدول المتقدمة، ومافيش أحسن من إنها تكون معروضة للجمهور، بدل ما تبقى في المخازن، أو يتم بيعها لبتوع الروبابيكيا.

الأجمل من ده كله إن الدخول للمتحف مجاناً طول أيام عمل الأسبوع.

“قصر السينما” بيعتبر المركز الثقافي الحكومي الوحيد المتخصص في تدريب المصورين والمخرجين، وصناعة وعرض الأفلام السينمائية من يوم افتتاحه سنة 1989 وبيضم قاعات متنوعة مجهزة للتدريب وعرض أحدث الأفلام، وتم افتتاحه رسميًا في نهاية شهر يونيو اللي فات بعد توقف استمر 3 سنين علشان تطويره وترميمه، وفعلياً بدأ القصر في استقبال الجمهور بشكل طبيعي ومجاني.