القاعة الضيقة: يعنى إيه تجريبى؟
Ahmed Abd El Gawad
البلد:
إضافة جديدة من إضافات مكتبة البلد الثقافية.. وهى “القاعة الضيقة”.. واحدة من الأفكار اللى عمرها ما هـ تموت.. ولأن الأفكار دائمًا بـ تعيش وتتوالد وتتكاثر فالناس قررت تستغل قاعة صغيرة جدًا فى المكتبة وتعمل لها شغل ثانى خالص بعيد عن أى حاجة.. شغل محتاج لفضاااااء..
الفضاء:
لأ مش اللى جاء فى بالك.. مش الفضاء اللى بره الأرض.. ركز معانا إحنا بـ نتكلم عن الفضاء اللى جوه الأرض وبالتحديد فى مصر، أيوه انزل شوية كمان بالكاميرا، ركز.. ركز تمام .. هنا القاهرة.. “Focus” بقى.. أيوه عند التحرير .. أيوه يا عم بتاع الثورة هو ده.. هاه كمل معايا كمل كمان.. تمام هنا بالضبط “شارع “عيون الحرية”.. يووه نقصد “محمد محمود” أيوه اللى كان فيه الضرب والجرافيتى والدخان.. هو بالضبط.. ادخل الشارع.. تمام.. لسه مركز بالكاميرا.. اقف أمام مكتبة الجامعة الأمريكية.. أيوه بعد المطعم على طول هو ده.. مرحبًا بكم فى “القاعة الضيقة”.
الضيقة:
طيب إيه الموضوع بقى؟.. نقول لكم إحنا.. القاعة الضيقة هى مشروع من مشاريع مركز ومكتبة البلد الثقافية وهو عبارة عن “أوضة”.. آه بالضبط كده “أوضة” مساحتها تقريبًا (3×5 متر) مش كبيرة خالص وفاضية إلا من شوية كراسي.. وحائط كبير بـ يتعمل عليها الفضاء التجريبى.
التجريبى:
بـ نسمع الكلمة دى كثير: “فن تجريبى”.. “مسرح تجريبى”.. “فيلم تجريبى”، تعالوا نقول لكم إيه الموضوع ده.. التجريبى هو مصطلح دخل الفنون والأداب المعاصرة وفيه بـ يحاول الفنان/ الكاتب أنه يدخل عالم ثانى ويجرب الأشكال الفنية الجديدة، أو طرق الكتابة المختلفة علشان يوصل لحاجة جديدة.. والحاجة أم الاختراع.. علشان كده الاختراع ده إما بـ يكون جامد جدًا أو غريب على الناس.
الناس:
يعنى إيه تجريبى.. طيب ما تيجوا نقول لكم يعنى إيه ناس؟ الناس هما اللى بـ يعملوا الفن والقيمة.. يعنى لو الناس تكلمت عن فن معين لازم يعيش.. لو اهتموا به لازم يتعرف.. لو اشتروا الكتاب لازم يتطبع كثير.. لو شيروا الصورة لازم تتشهر ويشتهر صاحبها.. شفتوا بقى أن الأصل فى الموضوع هو الناس مش حد ثانى؟.. الفنان ده عبارة عن حلقة وصل بين الإلهام/الرسالة اللى عنده والناس.. همزة الوصل دى هى العمل الفنى.. والقاعة الضيقة هدفها هو الناس.. عاوزة كل الناس تتفرج على الفن.. لكن من منظور جديد.
جديد:
والجديد فى الموضوع هو اهتمام القاعة الضيقة بالفن التشكيلى ومحاولة شرحه للناس وبـ تعمل أمثلة عليه بمعارض مختلفة.. أو محاولة الدمج بين عملين فنيين مع بعض.. زى ما عملت حدث ارتجالى بين الكتابة والكاريكاتير.. شارك فيه الشاعر رامى يحيى وفنان الكاريكاتير مخلوف.. ومن الناس خذوا الأفكار وحولوها لكلام ورسم فى محاولة لتغيير المفاهيم والتركيز على الإبداع فى شكل جديد، قولت لى يعنى إيه مفاهيم؟ آه.. قصدك يعنى إيه تجريبى؟
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
