The Definitive Guide to Living in the Capital , Cairo , Egypt

فن وثقافة
المجلس الأعلى للثقافة

المجلس الأعلى للثقافة: اتفرج يا سلام

تم التقييم بواسطة
Ahmed Abd El Gawad
قيم
قيم الآن
المجلس الأعلى للثقافة: اتفرج يا سلام

قرار جمهورى:

قرار جمهورى رقم 150 لسنة 1980 م بإنشاء المجلس الأعلى للثقافة بديلًا للمجلس الأعلى لرعاية الفنون والآداب والعلوم الاجتماعية، باعتباره هيئة عامة بحيث يتبع الوزير المختص بشؤون الثقافة المصرى.

 

المهمة:

مهمة كبيرة على فكرة أنك تكون مسؤول عن مجلس زى ده وقبل ما نحكى عن المجلس وتفاصيله عاوزين نقول لكم عن مهمته… لما صدر قرار إنشاء المجلس الأعلى لرعاية الفنون والآداب سنة 1956كان كل مهمته أنه ينسق جهود الهيئات الحكومية اللى بـ تشتغل فى الفنون والآداب ويربط الجهود ىببعضها.. والناس صراحة ما كذبوش خبر.. عملوا اللائحة الداخلية وفيها أهم أهداف المكان.. خذ عندك: تيسير الثقافة للناس وكمان ربطها بالقيم الروحية، تعميق ديمقراطية الثقافة يعنى يوصلوا بها لكل الناس فى كل مكان فى مصر، وتنمية المواهب فى كل مجالات الثقافة والفنون والآداب، والاهتمام بالتراث القديم، وتأكيد قيم المجتمع الدينية والروحية والخلقية.

 

يعنى إيه:

يعنى إيه مجلس أعلى للثقافة؟ سؤال حيرنا جدًا وإحنا عاوزين نكتب عن الموضوع ده، يعنى إيه مجلس يكون هو أكبر وأهم مكان فى مصر بـ يخطط ويرتب لكل حاجة لها علاقة بالثقافة.. عارفين ده معناه إيه؟ معناه أن الثقافة وأهلها من المفروض يكون مكانهم فى المجلس ده.. وأن الحياة الثقافية من كبيرها لصغيرها فيه تمثيل لهم فى المجلس.. عمومًا تعالوا نتفرج عليه.

 

اتفرج يا سلام:

“اتفرج يا سلام” جملة شعبية قديمة كانت بـ تُقال فى عروض الأراجوز والساحر، واتفرج يا سلام على مجلسك الأعلى هو عبارة عن مبنى ضخم جدًا وتصميمه المعمارى تحفة..تقريبًا 7 أدوار كل دور له علاقة بتخصص معين من فنون وآداب وعلوم اجتماعية وفلسفة وتاريخ وإصدارات فى مجالات كثير..

أما عن أنشطة المجلس فصراحة هى كثير جدًا ندوات ولقاءات ومؤتمرات ومناقشة قضايا..وحفلات شعرية.. والاهتمام بالتواصل بين أدباء مصر والأدباء الأجانب.. والاهتمام بعمل احتفاليات لرموز الأدب والفكر والإبداع والفكر زى: ابن رشد، رفاعة الطهطاوى، جمال الدين الأفغاني، توفيق الحكيم، نجيب محفوظ، ألكسندر بوشكين، أم كلثوم، برتولد برخت، سوفوكليس، لوركا، محمد عبده وآخرين.

وجنب كل اللى فات عندنا كمان مجموعة إصدارات زى سلسلة الكتاب الأول واللى باين من اسمه.. هى سلسلة بـ تهتم بأول عمل للكاتب.. وفيه سلسلة المؤلفات ودى للكتب اللى بـ توافق عليها لجان المجلس وبـ تنشر الكتاب بعدها.. وسلسلة روائع الأدب العربى ودى واحدة من أهم السلاسل لأنها بـ تهتم بنشر مجموعة كبيرة من الكتب التراثية اللى أثرت فى الوعى العربى بشكل عام.. والملحوظة المهمة أن أسعار الكتب دى بـ يبقى مدعم وبجد فى متناول الجميع.

وآخر حاجة بـ يعملها المجلس هى جوائز الدولة اللى بـ تجتمع كل اللجان علشان ترشح ناس تكسبها وهى جوائز الدولة التقديرية والتشجيعية وجائزة النيل والجوائز دى على فكرة بـ تعتبر من أهم الجوائز وأغلاها قيمة فى مصر.

نصيحة 360

اعرف معلومات أكثر من موقع الهيئة العامة للاستعلامات.

أحسن حاجة

أن مكانه عبقرى جدًا جنب دار الأوبرا المصرية.

أسوأ حاجة

أن عدد زواره قليل برغم تعدد أنشطته وده راجع لضعف الجانب الإعلامى فى المجلس.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح