The Definitive Guide to Living in the Capital , Cairo , Egypt

النجوم مش بس في التلفزيون.. أهم 12 مسلسل إذاعي في رمضان 2019
بواسطة
Omar Abd-elmaqsoud

فكرت في مرة تغمض عينك وأنت بتتفرج على فيلم أو مسرحية أو مسلسل؟؟ طيب ما تجرب تعملها ! .. طيب قدرت تميز صوت الفنانين المشاركين في أي عمل بتحبه من غير ما تبص على الشاشة، أو تشوف صورته؟ لو قدرت وحبيت الموضوع يبقى أنت واحد من عشاق الراديو، ونحب نعرفك أنك على ميعاد في رمضان ده مع مجموعة كبيرة من المسلسلات اللي هتسمعها بأصوات فنانينك المفضلين، على محطات راديو كتيرة.

تعالوا نشوف هنسمع مين السنة دي:

  • مسلسل ” توأم روحي”

الفنان “كريم عبدالعزيز” داخل سباق الدراما الرمضانية السنة دي بصوته في مسلسل “توأم روحي” اللي بيدور أحداثه حولين (طلعت) و(بهجت) توأم متماثل فى الشكل، لكن زي أي توأم مختلفين فى ميولهم وطريقة تفكيرهم، فواحد ورث الانضباط عن أبوه والثاني ورث حب الفن عن والدته.

المسلسل هيشاركه في البطولة الفنانة “سوسن بدر” و”إنعام سالوسة”، وممكن تسمعوه على شبكة راديو النيل الساعة 4:30 قبل الفطار.

  • مسلسل “مع كامل احترامي”

المسلسل من بطولة  “أيتن عامر” و”محمد أنور” و”أوس أوس”، وهو عمل كوميدي، أحداثه بتدور حوالين “كامل” وصديقه القديم “بهجت” واللي هيدبر له مقالب علشان يرجعه لعقله ويتعلم من أخطائه.

المسلسل ممكن تسمعوه على ميجا  FM، نغم FM، راديو هيتس، وشعبى  FM، الساعة 6:00.

  • مسلسل “عربي إنجليزي”

“أحمد فهمي” و”هنا الزاهد” عاملين دويتو السنة دي فى التليفزيون والإذاعة ؛ وفي الإذاعة هيقدموا مسلسل “عربي إنجليزي” اللي بيناقش الاختلافات الثقافية بين العرب والغرب، من خلال مدرسين واحد منهم بيمثل الفكر الغربي والثاني الفكر العربي، أما التلفزيون فممكن تشوفوهم فى الدراما التليفزيونية “الواد سيد الشحات”.

ممكن تسمعوه في محطات راديو النيل الساعة 3:45.

  • مسلسل “نوسة نحلة”

محطات ميجا  FM، نغم  FM، راديو هيتس وشعبى  FM هتقدم أول عمل إذاعي للفنانة “حلا شيحة ” خلال موسم رمضان 2019 بعد رجوعها من الاعتزال، واللي هتقدم فيه دور “نوسة نحلة” في مسلسل بنفس الاسم.

 هيشارك في العمل ده “محمد عبدالرحمن” و”أحمد شيبة” وهيتناول المسلسل شخصية (نوسة) اللى ظهرت فى فيلم “اللمبي” وازاي اتغيرت  بعد 16 سنة، وخصوصًا بعد ما انفصلت عن جوزها، واتحملت مسئولية ابنها.

المسلسل هيتعرض يوميًا الساعة 5:15 .

  • مسلسل “وش في وش”

الكوميديان الفنان “أحمد حلمى”، زي ما عودنا دايماً بإنه دايمًا معانا خلال رمضان كل سنة بمسلسل إذاعي جديد؛ والسنة دي هيدخل السباق ويمضي حضور بمسلسل “وش في وش” وهو أكيد عمل كوميدي بيناقش مواضيع كتير ومهمة في حياتنا.

 المسلسل هيتذاع حصريًا على راديو “إينرجي”.

  • مسلسل “قمر فى سكة سفر”

الفنان “هانى رمزى” هيشارك فى رمضان 2019، بمسلسله الإذاعي الجديد “قمر فى سكة سفر” بمشاركة “ويزو” و”ضياء المرغنى”، و”إنتصار” و”أحمد حلاوة”

وأكيد الأحداث هتبقى في إطار كوميدي، وممكن تسمعوه على إذاعة “الشباب والرياضة”.

  • مسلسل “رحلة حرب الشبكشي”

الفنان “أحمد رزق” هيرجع بعد غيبة بدراما وإذاعة خبطة واحدة، الدراما هتبقى بمشاركة الفنانة “دنيا سمير غانم” فى “بدل الحدوتة 3” والإذاعة هتبقى في مسلسل «رحلة حرب الشبكشي» واللي بيشاركه في بطولته الفنانة “هبة مجدي” والفنان “أشرف عبدالغفور” و”سميرة عبدالعزيز” وممكن تسمعوه في إذاعة القاهرة الكبرى.

  • مسلسل “ابن خالة حفيد أخطر رجل في العالم”

“شيكو” و”هشام ماجد” بيضربوا من جديد في المسلسل الإذاعي “ابن خالة حفيد أخطر رجل في العالم” بعد ما اتقرر خروج مسلسلهم التلفزيوني “اللعبة” من خريطة دراما رمضان 2019.

المسلسل أكيد كوميدي لايت، وهيتذاع على “إينرجي”.

  • مسلسل “أنا يا ناس”

مسلسل “أنا يا ناس” مسلسل من العيار التقيل، هارك فيه مجموعة من نجوم جيل التمنينات زي “مصطفى قمر” و”ندى بسيوني” و”ريهام عبدالغفور” و”شريف باهر” و”أحمد صيام” وأحداثه بتدور فى إطار فانتازى، حولين طبيبة هترجع من بره بجهازً بييحول الأفكار والأحلام لفيديو.

  • مسلسل “عين الحياة”

الفنان القدير، صاحب الصوت الرخيم والمميز “عبدالرحمن أبو زهرة” هنسمعه السنة دي في مسلسل “عين الحياة” واللي هيتكلم فيه عن أخلاق بنت الحارة الشعبية المتعلمة، اللي هتنجو من زلزال وهتبدأ تحكي عن اللي حصلها وشافته تحت الأنقاض.

المسلسل بيصور أحداثً واقعية ومستقبلية، وهيشارك فى بطولته “يسرا اللوزي”، “ميرنا وليد”، “أحمد ماهر”، “ناصر سيف” و”مصطفى حشيش”، وممكن تسمعوه على إذاعة “صوت العرب”.

  • مسلسل “الشهبندر”

الفنانة “نشوى مصطفى” بمشاركة الفنان “أحمد بدير”، هيتواجدوا خلال الموسم الرمضاني السنة دي بأصواتهم في مسلسل “الشهبندر” وهيتذاع على  إذاعة القاهرة الكبرى.

  • مسلسل “برنس ونص”

الفنان “طارق عبدالعزيز” هيشارك أبطال برنامج “ستار دي نايت بالعربي” فى رمضان السنة دي بمسلسل “برنس ونص” وهيتذاع على شبكة البرنامج العام.

مقترح