The Definitive Guide to Living in the Capital , Cairo , Egypt

فن وثقافة

بالصور.. كايرو 360 في زيارة لمعرض “سنابل السبع العجاف” في المعادي

السبع العجاف الفنان طاهر حمودة المعادي جاليري نقوش فنون معارض القاهرة معارض فنية معرض سنابل السبع العجاف
بالصور.. كايرو 360 في زيارة لمعرض “سنابل السبع العجاف” في المعادي
بواسطة
Mohamed Talaat

المعادي بتتميز بمطاعم الأكل المميزة، وكمان المعارض الفنية اللي بتقدم لنا أحلى الإبداعات، ومن النهارده  الأحد 24 فبراير بدأ في جاليري نقوش بالمعادي معرض “سنابل السبع العجاف”، اللي هيستمر لمدة 10 أيام وبيرصد الحقبة الزمنية الثورية بداية من 2011 وحتى عام 2018، من خلال أعمال فنية وتصميمات للفنان الدكتور طاهر حمودة، المدرس بكلية الفنون الجميلة جامعة الإسكندرية، وإحنا في كايرو 360 التقينا به علشان نتعرف أكتر على الفكرة من المعرض ده.

حمودة قال أن الفنان هو مرآة المجتمع، وأعماله هي الكاشف عن التجارب الشخصية والمجتمعية، وبتفضل أعماله مع مرور الوقت شاهد على الحقب الزمنية اللي عاشها وتفاعل معاها، وبيضيف إنه بعد ما اتخرج من الجامعة مباشرة انطلقت أحداث ٢٠١١، وما تلاها من تطورات لحد النهارده.

بيوضح حمودة إن المعرض بيقدم مجموعة من الأعمال تم إنتاجها على فترات زمنية متقطعة، خلال سبع سنوات، وعلشان كده أطلق على المعرض عنوان “السنوات العجاف”، وبيقول إن السنوات دي ظهرت على أعماله، اللي بيعتبرها تحدي لجيل كامل مر بلحظات أمل ويأس وضبابية وتغيرت مفاهيم ومعتقدات وعادات كانت ثابته في وقت ما.

وبيأكد المدرس بكلية التربية أنه رغم مسمى المعرض وما يحمله معناه لمعاناة كبيرة، إلا أنه فيه جانب مشرق بالاستبشار بالمستقبل، وأن الأعمال المعروضة بتنقل الجمهور لمصر القديمة، ولزمن سيدنا يوسف عليه السلام، والشدة اللي كانت فيها مصر واستغرقت سبع سنوات وتلاها الخير بعد ذلك، لأن لسه فيه بارقة أمل فى عيون الشباب، اللي بيحاربوا ذاتهم علشان ميفقدوش الأمل واللي مش لازم يموت.

المعرض مفتوح حالياً في جاليري نقوش من الساعة 6 مساءً – 7 ب شارع 199 – دجلة المعادي.

مقترح