بتحب التصوير؟ خمس أماكن في القاهرة لخدمة المصورين
أماكن للمصورين تحرير صور تعلم التصوير دليل المصورين دوتس ستوديو عشاق التصوير فوتوبيا كايرو فوتوجرافي كلوب مركز الصورة المعاصرة
Omar Mossad
لكل مجال عمل مجتمع خاص بيه بيتبني مع الوقت وبيكتسب درجة من الثبات والمصداقية تخليه جهة موثوقة لتقييم كل اللي بيشتغلوا في المجال، وتخليه أداة مهمة لبناء السمعة الجيدة وتكوين شرايح جمهور أكبر اعتمادًا على السمعة دي، ومن ثم القيام بقفزات واسعة على طريق النجاح في المجال ده.. المجتمعات اللي زي دي ما بيتوقفش دورها على المتابعة والتقييم وبس، بنلاقيها مع الوقت بتبدأ كمان تمارس نوع من التكافل الداخلي، ونشوفها بتتجه لخدمة نفسها بنفسها، وتسعى لوضع إيديها على النواقص وتكملها، سواء كانت النواقص دي معرفة أو أدوات ومعدات أو بيئة للممارسة والتعلم.
في مجال سريع الحركة والتطور زي مجال التصوير اتكون المجتمع اللي قلنا عليه ده في وقت قليل نسبيًا، ده غير أنه كان مجتمع متماسك كفاية لدرجة خلتنا نقدر نعتبره كيان واحد، الكيان ده أنتج لنا –ولنفسه- باقة متكاملة من الخدمات المختلفة اللي بيحتاجها أو بيدور عليها أفراده.. مساحات للتدريب، مواقع للتنفيذ، أماكن لتأجير المعدات.. وهكذا.. وإحنا هنحاول هنا نسرد قايمة سريعة ببعض الجهات اللي بتقدم الخدمات دي للمصورين في القاهرة.
“كايرو فوتوجرافي كلوب” أو: نادي القاهرة للتصوير الفوتوغرافي هو أشهر الجهات اللي بتخدم المصورين في القاهرة، ده علشان هما مش مقتصرين بس على الخدمات وإنما كمان مركزين في الفعاليات وبناء شراكات متعددة مع جهات كتيرة لتحقيق انتشار واسع..
“سي بي سي” يعتبر مجمع خدمي متكامل للمصورين بيغطي كافة احتياجاتهم من أول شراء واستئجار المعدات ومرورًا بتوفير كل الخدمات المعرفية والتدريبية، وكمان توصيل المصورين بالعملاء أو الجمهور اللي بيطلبهم، لحد الفعاليات الكتيرة اللي بتتعمل سواء للمارسة أو النقاش وتبادل الآراء والتعليقات على الصور بين المصورين وبعضهم.
“سي بي سي” موجود في المعادي قريب من محطة المترو، اعرفوا أكتر عنه واتواصلوا مع القائمين عليه من خلال صفحة فيسبوك بتاعتهم من هنا.. وتقدروا كمان تستفيدوا من المدونة اللي هما عاملينها علشان يناقشوا فيها قضايا تهم المصورين وبيطرحوا من خلالها محتوى تعليمي مبسط، شوفوها من هنا.
مركز الصورة المعاصرة هو مركز فني مختص بالتصوير، موجود في شارع عبدالخالق ثروت بوسط البلد، التركيز الكبير في أنشطته بيكون على المعارض اللي بتتعمل هناك باستمرار واللي بتضم أعمال فنية وإبداعية قوية جدًا، وبتمثل تدريب جيد للعين من خلال النظر للكادرات المميزة ومعرفة التكوينات الجيدة في الصور الحلوة.. وكمان من وقت للتاني بيعملوا ورش تدريبية أو ندوات تعليمية لمستويات مختلفة.. زوروا الموقع بتاعهم واعرفوا مواعيد التدريبات والأنشطة التانية وبقية المعلومات اللي هتحتاجوا تعرفوها من هنا.
“فوتوبيا” هي مساحة متعددة الأغراض والوظائف والأنشطة، لكن بيجمع كل أنشطتها هدف واحد هو خدمة المصورين وتوفير كافة احتياجاتهم.. المكان بيستضيف طول الوقت معارض ودورات تدريبية وورش عمل ونوادي تفاعلية.. وأهم فعاليات المكان هي ورش اليوم الواحد اللي بتبقى متخصصة جدًا ومحددة جدًا في الموضوعات اللي بنتناقشها، وبتغطي كل موضوع بتفاصيله.. كمان “فوتوبيا” تعتبر من المساحات ذات السبق الزمني في المجال ده، وبالتالي فهي مش مجرد مساحة خدمية جيدة إنما كمان هي صاحبة ريادة.. تقدروا تعرفوا عن المكان وأنشطته أكتر من هنا.
“دوتس ستوديو” هو مكان تابع لمساحة العمل المشتركة “دوتس سبيس” في الدقي، وهي مساحة بتخدم الفنانين بشكل رئيسي سواء كانوا طلبة أو ممارسين أو محترفين أو حتى مجرد هواة.. المكان بيوفر الاستوديو بمعداته وكمان بيوفر خدمات تانية زي الدورات والورش والندوات والمسابقات والفعاليات التنافسية.. بالإضافة لأن المكان بيحاول يبني مجتمع مترابط من الفنانين فالتواجد فيه فرصة جيدة للتشبيك مع ناس نشطين في نفس المجال.. تقدروا تعرفوا أكتر عن المكان وخدماته من هنا.
استوديوهات تصوير حديثة النشأة نسبيًا، بتقدم مساحات مغلقة مجهزة بكافة المعدات الخاصة بالتصوير الداخلي.. المكان موجود في مدينة نصر، تقدروا تعرفوا عنه وعن خدماته من هنا.
في الختام حابين نقولكم بس أن الفايدة الكبيرة من الأماكن دي مش الخدمات اللي بتقدمها أد ما هي العلاقات الكتيرة اللي بتطلع بيها مع ناس شغالين في نفس مجالك، فتبتقى بتسمح لنفسك باحتكاك دايم مع مستويات مختلفة، وبتفتح لنفسك باب واسع للاستفادة المعرفية والعملية في المجال.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
