بتنظيم مؤسسة بيت الحكمة.. فعاليات الصين في معرض الكتاب
Mohammed Sabry
بتشارك مؤسسة بيت الحكمة للثقافة والاعلام السنة دي في معرض الكتاب 2017. وده من خلال جناح مساحته 180 متر، ومصمم على الطراز الصيني. الجناح هيكون في قاعات العرض المكشوف أمام بوابات صلاح سالم، واسمه “قاعة الكتاب الصيني”. هتعرض فيه أكتر من 10 آلاف كتاب من الصين في مجالات مختلفة. وكمان هتنظم معرض فني للوحات أشهر الرسامين من الصين، تحت عنوان “الصين الزاهية”. ده غير الأفلام التسجيلية الحديثة والمسلسلات اللي هتتعرض كل يوم.
فعاليات بيت الحكمة في المعرض:
هتبدأ فعاليات بيت الحكمة في معرض الكتاب من يوم 27 يناير. بندوات وأمسيات متنوعة، منها ندوة عن دور الشباب في نهضة الدول، (التجربة الصينية). بيحاضر فيها الأستاذ (يانج شاو جون). وكمان أمسية شعرية للشاعر الصيني (شان يونج تشن)، اللي هيلقي فيها مجموع من قصائده الصينية المترجمة للعربية.
يوم 31 يناير، هيكون فيه لقاء مع الأديبة الصينية “عائشة”. ومناقشة لأعمالها اللي بتتناول حياة مسلمي الصين. وبتكون من ضمن الحضور مترجمة أعمالها، المترجمة “يارا المصري”.
ده غير عدد كبير من الندوات في مجالات مختلفة زي: الثقافة والسياحة والتاريخ. ودي هتكون مستمرة لحد آخر يوم من أيام المعرض.
برنامج جناح بيت الحكمة “قاعة الكتاب الصيني”:
“قاعة الكتاب الصيني” هيكون فيها عدد من الفعاليات والندوات خلال المعرض. أهمها حفل إطلاق الطبعات العربية لإصدارات دار نشر “دادي” الصينية، المتخصصة في كتب الأطفال. وهيكون في ندوة للأستاذ مصطفى عبادة، بعنوان “تجاربي في الصين”. هيتكلم فيها عن تجربته الطويلة في زيارة الصين. وكمان هتقام حلقة نقاشية لشباب وخبراء المترجمين، عن إشكاليات الترجمة من الصينية، وكيفية التغلب عليها.
كايرو 360 بتتمنى لكم وقت مفيد.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
