The Definitive Guide to Living in the Capital , Cairo , Egypt

قبل أيام قليلة، افتتحت وزارة الآثار والسياحة المصرية، متحف المركبات الملكية في منطقة بولاق أبو العلا، واللي بيضم مجموعة نادرة ومميزة من وسائل النقل والقطع الأثرية اللي كانت بتستخدم على يد الملوك والحكام المصريين في فترة الحكم الملكية، وخلال السطور الجاية هنقول لكم على كل اللي محتاجين تعرفوه عن المتحف المهم ده.

متحف المركبات الملكية بيضم نياشين خاصة بالخديوي إسماعيل، وكمان فيه ميدالية اتحاد الفروسية المصنوعة من الذهب، وتمثال من المعدن للاعب “بولو” وحصانين صغيرين مصنعين من البرونز، ومجموعة تماثيل من البورسلين الملون، ده غير السروج العسكرية اللي كانت بتستخدم في العصر العثماني، وسروج أطفال وسيدات.

والمميز في المتحف أنه موجود أمام كل تحفة أثرية، كتيب شرح على طريقة برايل لمساعدة ذوي الهمم من فاقدي الإبصار، وكمان هيكون فيه شرح لذوي الهمم من أصحاب الإعاقة السمعية عن طريق لغة الإشارة.

وبيضم المتحف مجموعة من العربات الملكية من أنواع مختلفة، أشهرها العربة التي أهدتها الإمبراطورة الفرنسية أوجيني إلى الخديوي إسماعيل بمناسبة افتتاح قناة السويس، ومعمل ترميم، و5 قاعات عرض منهم قاعة للعرض المرئي لعرض أفلام وثائقية عن المركبات.

والمتحف بيعد من أندر المتاحف على مستوى العالم بعد متاحف إنجلترا والنمسا وروسيا، وأنشأه الخديوي إسماعيل سنة 1863.

سعر الدخول للمتحف 20 جنيه فقط لا غير، و10 جنيهات للطلبة، واستخدام كاميرا التصوير بسعر 50 جنيه، والتصوير بالموبايل مجانًا، موجود في منطقة بولاق أبو العلا، ومواعيد الزيارة من 9 صباحًا، حتى 5 مساءً.