The Definitive Guide to Living in the Capital , Cairo , Egypt

مصر مليانة مهرجانات فنية وثقافية الفترة دي، وأحدث المهرجانات اللي بننصحكم تزوروها هتكون في جنوب مصر خلال الفترة الجاية، وده بمناسبة احتفال مصر بتعامد الشمس على وش تمثال رمسيس الثاني، وعلشان كده هتقيم الهيئة العامة لقصور الثقافة مهرجان أسوان الدولي للثقافة والفنون في دورته الثامنة، واللي هيكون في مدن محافظة أسوان ومدينة أبوسمبل خلال الفترة من 16 ولحد 22 فبراير الجاري.

المهرجان ده بيهدف لتنشيط السياحة الثقافية والأثرية، وهيشارك فيه 14 فرقة فنية مصرية وعالمية بتمثل فلكور كل دولة.

وهتشارك السنة دي فرق “روسيا، اليونان، رومانيا، سيرلانكا، المكسيك، تونس، الجزائر، بنين، المغرب، السودان، صربيا، أمريكا، بولندا، بلغاريا”، بالإضافة لـ 10 فرق فنية تابعة للهيئة العامة لقصور الثقافة بتمثل الفلكلور المصري وهي فرق “الوادي الجديد، مطروح، بورسعيد، أسيوط، الشرقية، سوهاج، أسوان، العريش” بالاشتراك مع فرق توشكى وشلاتين للفنون الشعبية.

وهتشمل فعاليات مهرجان تعامد الشمس، تنظيم استعراض من جميع الفرق دي على المراكب الشراعية فوق نيل مصر الخالد من أمام حديقة فريال التاريخية بمدينة أسوان، بهدف إتاحة الفرصة للمواطنين والسائحين لمشاهدة العروض دي، واللي هتتواكب مع إطلاق مئات البلونات اللي بترفع علم مصر وشعار تحيا مصر.

وبتحتفل مصر بتعامد الشمس على وش رمسيس الثاني، وده بيحصل كل سنة في أيام 22 أكتوبر و22 فبراير، ودي أيام مولد رمسيس الثاني، ويوم تتويجه ملك على مصر، والظاهرة دي بتعلن عن بداية موسم الفيضان والزراعة فى مصر القديمة، وبتعتبر واحدة من ضمن 4500 ظاهرة فلكية عرفتها مصر القديمة عبر عصورها المختلفة.