The Definitive Guide to Living in the Capital , Cairo , Egypt

خلال أيام، وبالتحديد يوم 21 أكتوبر، هتنطلق دورة مهرجان مصر الدولي لموسيقي الفرانكو، اللي هتستمر لحد يوم 25 أكتوبر 2019، وهيكون الافتتاح على مسرح هوليوود في مدينة شرم الشيخ، وهيشارك في الدورة الجديدة 12 دولة عربية وأوربية، وفي السطور اللي جايه هنقولكم على تفاصيل المهرجان اللي بيقام للسنة الثالثة على التوالي.

المهرجان هيكون فيه منافسة بين 7 دول هتشارك في مسابقتي الأغنية السنجل واللي هتكون خاصة بألحان وأغاني موسيقار الأجيال محمد عبدالوهاب، واختارت اللجنة المنظمة للمهرجان دولة الجزائر علشان تكون ضيفة شرف الدورة الثالثة وده لأن الجزائريين بيمثلوا أكبر عدد متنافس في مسابقتي المهرجان بـ9 أصوات غنائية بين هواة ومحترفين، وكمان علشان المطربة الفرنسية اللي من أصل جزائري “سارة أيوب” هتكون مشاركة في المهرجان.

ومن مصر هتشارك أوركسترا الشباب والرياضة، بفرقتهم الموسيقية، في مهرجان مصر الدولي لموسيقى الفرانكو واللي جهزوا برنامج مميز بعازفين ومجموعة فنانين، وهيكون برنامجهم بالكامل مخصص لموسيقى الفنان محمد عبدالوهاب سواء اللي غناها أو اللي لحنها لنجوم الزمن الجميل.

المهرجان هيكون السنة دي برعاية ودعم وزارات “الثقافة، السياحة، والشباب والرياضة” وكمان هيئة تنشيط السياحة والهيئة الوطنية للإعلام، ومحافظة جنوب سيناء.