The Definitive Guide to Living in the Capital , Cairo , Egypt

الصورة الرئيسية: ياسر محمود

عشاق زيارة شارع المعز في رمضان على موعد مع مناسبة فنية وثقافية مميزة هتستمر لحد يوم 24 رمضان الجاري، وهي فعاليات مهرجان ليالي رمضان، اللي بتقدمه الهيئة العامة لقصور الثقافة في منطقة سور القاهرة الشمالي بشارع المعز.

في السطور الجاية هنعرفكم على 5 معلومات عن المهرجان ده:

1 – بيقام مهرجان ليالي رمضان على مسرح سور القاهرة الشمالي بشارع المعز، وبيتضمن كتير من الأنشطة والأمسيات الثقافية، بالإضافة لعدد من العروض الفنية بمشاركة مجموعة من الفرق الفنية والاستعراضية، وهتلاقوا كمان هناك معرض مصغر للكتب.

 2 – المهرجان بيتضمن برنامج مميز للأطفال، بيشمل ورش للرسم بخامات متعددة ومجسمات وصلصال عن أهم مظاهر الشهر الكريم، بالإضافة لعروض فنية ومسرح عرائس وسينما للطفل وورش حكى ومسابقات وألعاب.

3 – تقدروا تستمتعوا كمان في مهرجان ليالي رمضان بمجموعة من ورش الحرف البيئية واليدوية زي: الخزف والسجاد، والحصير، والخوص، والخيامية والتصديف والطرق على النحاس، ده غير المعارض الفنية ومعرض الكتب‪.

4 – من الورش المهمة اللي تقدروا تشاركوا فيها خلال فعاليات المهرجان، ورش تعليم الكورشيه، والخرز والجلد والحرق على الخشب والتشكيل بالخيوط ورسم البورتريه.

5 – من ورش الأطفال المميزة في المهرجان: ورش للرسم على الوش والرسم الحر وعمل فانوس رمضان والصلصال. المهرجان بيقدم كمان ورش لذوي الاحتياجات الخاصة.

 

الوصول لشارع المعز من أسهل ما يمكن، لو معاكم عربية تروحوا لمنطقة الحسين، وتركنوها في مكان مناسب هناك وتتمشوا لحد شارع المعز، ولو بالمواصلات انزلوا محطة مترو العتبة، وهتلاقوا هناك عربيات هتنزلكم بالقرب من شارع المعز.