The Definitive Guide to Living in the Capital , Cairo , Egypt

لو كنتم من عشاق الفيديو بشكل عام، والتجارب الفنية المختلفة بشكل خاص، تقدروا تستمتعوا حاليًا بمجموعة من أجمل مقاطع الفيديو والأفلام المختلفة اللي بيقدمها مهرجان القاهرة العاشر لفنون الفيديو والأفلام التجريبية.. تفاصيل أكتر عن المهرجان؟ في السطور الجاية.

مهرجان القاهرة للفيديو، هو مهرجان دولي مختص بتقديم وعرض فنون الفيديو والأفلام التجريبية، تم تأسيسه بهدف إنه يكون منصة للممارسات الفنية المعاصرة للصورة المتحركة من خلال اتاحة فرص للفنانين لعرض أعمالهم وتجاربهم  للجمهور.

فى العام ٢٠٠٥ بدأ مهرجان الفيديو، واللي بيهدف لخلق مساحة كشف وحوار بين الفنانين والجمهور، وتطور المهرجان عبر جميع دوراته السابقة لحد ما وصل لصورته الحالية.

بيتيح المهرجان للجمهور مشاهدة عروض لأعمال فيديو تجريبية في أشكال مختلفة منها العروض السينمائية والعروض ذات التجهيزات الخاصة أو اللي بتستخدم وسائط متعددة، ده غير عروض الفيديو التفاعلية والواقع الافتراضي، ويتضمن المهرجان كمان لقاءات مع الفنانين في حوارات مفتوحة.

تعالوا نتعرف أكتر على المهرجان من خلال 3 معلومات فيهم الخلاصة:

1 – الدورة العاشرة من المهرجان بتستضيفها العاصمة المصرية في الفترة من ١ إلى ٢٠ أكتوبر.

2 – أجندة المهرجان السنة دي فيها ٩ برامج مختلفة، وهنشوف ٧٨ فيلم من ٢٧ دولة.

3 – هنتفرج في المهرجان على تجارب فنية، ما بين الأغاني المصورة، وفيديو الواقع الافتراضي، وفن الجليتش، والفنون الأدائية، والصور المولدة بالحاسوب أو السي جي آي، والفيديو السردي، والأفلام المقالية، والأفلام الشعرية، وأفلام الكوفيديو.

وأخيرًا..

تقدروا تشوفوا جدول كامل لكل عروض المهرجان من هنا.