The Definitive Guide to Living in the Capital , Cairo , Egypt

تعرف إن الشنط البلاستيك سبب مهم في تخريب البيئة من حوالينا؟ في السطور الجاية هنثبت لكم ده بالأمثلة وكمان هنعرفكم على تجربة “جرينش” الشبابية المهمة اللي بتحاول تنشر وعي بيئي في المجتمع المصري.

في الفترة الأخيرة انتشرت قناديل البحر بشكل مخيف بطول البحر المتوسط سواء في الساحل أو إسكندرية أو بورسعيد، ومن الأسباب اللي أدت لظهور القناديل بالكم ده في البحار بجانب التغير المناخي والملاحي كان قلة عدد السلاحف المائية  وتعرضها للإنقراض لأسباب كتيرة، واللي بتتغذى على قناديل البحر.

والمثير للدهشة إن من الأسباب الرئيسية لموت السلاحف هو إنها بتتخدع من الأكياس البلاستيك اللي مرمية في البحر وبتفتكرها قنديل البحر وتاكلها وده بيؤدي لوفاتها، كمان الأكياس البلاستك من أكثر المنتجات اللي ما بتتحللش بسهولة وده بيؤدي لموت كثير من المخلوقات المائية. كل ده بيحصل لما حضرتك بتقرر تشتري كيس بلاستك وترميه.

خلصانة بكيس ورق

تعرفوا إن مصر بتنتج كمية أكياس بلاستيك مهولة كل سنة؟ ومنها طبعًا اللي بيتم رميه في البحر، ومنها اللي مش بيتحلل ويفضل يتكوم أو يتدفن أو يتحرق.. وفي جميع الحالات إحنا المتضررين، لدرجة إن فيه بعض البلاد دلوقتي بطلت تنتج أكياس البلاستيك حفاظًا على البيئة وبقت بتستخدم الورق أو القماش. ومن هنا جاء دور جرينش واللي اتكلمنا عنهم قبل كده في المقال ده. فاكرين كيس الفكهاني الورق اللي كنا بنشوفه في الأفلام ده طلع إنه مفيد أكتر!!

 

جرينش قرروا أنهم ينقذوا النظام البيئي بحلول بسيطة تخلي الناس تبدأ تستغنى عن البلاستيك بالتدريج، منها أنهم يبدلوهم بكيس قماش أو ورق يشيلوه معاهم. لكن الخطوة الأكثر فاعلية هي أنكم تدوهم الأكياس البلاستيك اللي عندكم بدل ما ترموهم وهم هيعملوا منها منتجات زي الشنط والمحافظ والأكسسوارات واللي هتساعد إنها تستخدم بشكل عصري وما تترميش. وده بيحصل عن طريق كبس الأكياس بالحرارة فبتطلع زي القماش بالظبط، أو بتخرج في صورة خيوط تقدرالستات تستخدمها في عمل منتجات مميزة زي اللي بتتعمل بالكروشيه.

نشر الوعي البيئي

موضوع قناديل البحر أثبت لناس كتير التأثير الضار والقوي للتلوث، واللي بيأثر على الجو والنظام البيئي، واللي من نتائجه كمان التغير المناخي والجو الحار الشديد اللي بنعاني منه حاليًا. بدأ جرينش إنهم يتواصلوا مع بعض الشركات علشان يغيروا من ثقافتهم ويتسخدموا منتجات طبيعية بديلة للبلاستيك.

وبدأوا يعملوا منتجاتهم الخاصة اللي بتؤيد فكرتهم زي الشنطة اللي بتتطبق من القماش وتقدر تشيلها معاك دايمًا أو المحفظة وتقدروا تلاقوها هنا.

دوركم إيه؟

حاولوا تقللوا من استخدام الأكياس البلاستيك واستبدالها بالورق أو القماش، ويا ريت لو عندكم أكياس بلاستيك مش بستتخدموها تدوها لجرينش وممكن تتواصلوا معاهم من خلال صفحتهم هنا.