The Definitive Guide to Living in the Capital , Cairo , Egypt

فن وثقافة

حسن أبو علي.. فنان بدرجة دكتور أسنان

حسن عبدالستار رسم مبدعين من القاهرة
حسن أبو علي.. فنان بدرجة دكتور أسنان
بواسطة
Omar Abd-elmaqsoud

لما تبقى 7 صنايع بس بختك مش ضايع يبقى باختصار هتبقى “حسن عبدالستار” دكتور الأسنان اللي جمع بين شغله ودراسته وشغفه وموهبته في حته واحده، لأ ومميزة وليها بصمة مختلفة عن كل اللي سبقوه كمان.

علشان مانطولش في الكلام، “حسن ” طبيب أسنان ناجح وشاطر اتخرج من كلية طب أسنان جامعة المنصورة دفعة 2005، ولإنه من جيل التمنينات، فكان طبيعي يعدي على قنوات ART 3 للأطفال وسبيس تون، لكن الجميل إن القنوات دي سابت جواه أثر كبير، بدأ يظهر بشكل واضح على طبيعته المرحة، وأسلوبه الكوميدي في التعامل مع الأطفال والكبار في شغله.

ولإن شغلنته من الشغلانات المرعبة بالنسبة لكل اللي عندهم مشاكل في أسنانهم، ولإن دايمًا دكتور الأسنان أو “ضاكتور السنان” زي ما بيحب حسن يسميه بيتصور على إنه وحش كاسر، قرر حسن يستغل موهبته في الرسم وحبه للكرتون في إنه يغير الصورة النمطية عن دكتور الأسنان من خلال رسمه للأحداث اللي بتحصله وتقابله في عيادته بشكل كاريكاتوري كوميدي.

حسن من صغره وهو بيحب التلوين والرسم زي ما قالنا، ولما دخل الكلية، كان برضه بيحب يرسم، ولحد ما اتخرج واشتغل وهو بيحب يرسم ويلون، حتى مع تطور أدوات الرسم والتلوين، اتعلم هو كمان ازاي يستخدمها، واستغنى بشكل جزئي عن الورقة والقلم والألوان، وبدأ يرسم ويلون باستخدام التابلت.

رسومات حسن في الأول خدت طابع كوميدي وكاريكاتوري زي ما قولنا، لكن حب حسن للكرتون، وبالذات “جرينديزر” و “مازنجر” كانت البداية اللي طلعت موهبة حسن المدفونة والعبقرية في رسم وتلوين الشخصيات الكرتونية المختلفة بدقة وحرفية شديدة، أشبه بأفلام الكرتون والشخصيات الحقيقية، وأوقات كتير أصحابه كانوا بيتهموه إنه “شافف” الرسمة زي ما بيقول.

وعلشان رسم حسن كان دقيق ومحترف، قرر حسن يصور فيديوهات لنفسه وهو بيرسم ويلون من الألف للياء، علشان محدش يقوله إنه “شافف” الرسمة، وطبعًا الفيديوهات دي كانت مصدر سعادة لكتير من هواة ومحبي الرسم، ومحبي “حسن” شخصيًا كمان.

مشكلة حسن اللي وجهته في هوايته كانت حاجتين، أولهم إن كل حد من أصدقائه يعرف إن رسمه حلو، يطلب من حسن إنه يرسمه، لدرجة إن حسن تناول مشكلته دي مع أصحابه بشكل كوميدي وساخر من خلال رسوماته.

أما مشكلة حسن التانية كانت ارتفاع أسعار الألوان، ومواد الرسم والتلوين، وبالتالي كان اتجاهه لاستخدام التابلت في الرسم والتلوين أوفر وأدق، وكان ليه ميزة مهمة جدًا وهي الوضوح وظهور الرسمة كإنها حقيقية.

ممكن تتفرجوا على كل رسومات حسن من خلال صفحته على الفيس بوك “كرتون حسن عبدالستار“، بس أوعوا تتطلبوا منه يرسمكم هههههه.

مقترح