The Definitive Guide to Living in the Capital , Cairo , Egypt

دايمًا في رمضان بنحب نسهر ونغير المود والجو كل يوم، وعلشان كده إحنا في كايرو 360 هنقول لكم على أهم الحفلات المجانية اللي هتبدأ من 4 رمضان وهتستمر لحد يوم 25 رمضان، والخروجات دي هتكون يوميًا الساعة 9:30 مساءً.

ومتنساش أن الحفلات مجانية.

 

ممر بهلر

الجميل أن بعد نجاح مهرجان ليالي ممر بهلر بوسط القاهرة، كمان هيكون فيه “ليالى المقامات الروحية” في ممر بهلر في رمضان، ودي الدورة الرابعة لليالي دي، واللي بتتعمل بمناسبة شهر رمضان وهتبدأ “ليالي المقامات الروحية” من 4 رمضان حتى 10 رمضان، يوميًا الساعة 9.30 مساءً، وهيشارك فيها فرق من مصر وسوريا وفلسطين وإندونيسيا برؤية فنية لانتصار عبد الفتاح مؤسس المشروع .

الليالي دي بتهدف لتنمية الإنسان فنيًا وثقافيًا، وهي تعاون بين مؤسسة مصر الخير ومؤسسة حوار، والهدف الوصول إلى الساحات والميادين والشارع المصرى لاستعادة قيم وإبداعات الشخصية المصرية.

 

قبة الغوري

مكان مميز وناس كتير بتحبه، “قبة الغوري” موجودة في شارع الأزهر، وهتبدأ الاحتفالات هناك يوم الخميس 8 رمضان، بعنوان “طقوس السمو”، ويوم الجمعة 9 رمضان الشيخ محمود التهامي وفرقته هيقدموا لنا حفلة مميزة جدًا، والسبت  10 رمضان فرقة المولوية بقيادة الفنان عامر التوني هتكون موجودة، والأحد 11 رمضان الفنانة منال محي الدين هتمتعنا بفنها.

أما يوم الخميس 15 رمضان فهتحرض حفلة لفرقة الأوبرا للانشاد الديني، والجمعة 16 رمضان أوركسترا بيت العود العربي، والسبت 17 رمضان فرقة الموسيقى العربية للتراث، والخميس 15 رمضان فرقة الأوبرا للإنشاد، أما يوم الأحد 18 رمضان فهيكون فيه احتفالية رسالة سلام.

 

بيت السحيمي

أما بيت السحيمي اللي في نهاية شارع المعز فهيكون عندهم يوم السبت 10 رمضان قراءات في الشعر الصوفي، وبعدها فرقة “حلقة ذكر” هتقدم لنا أمسية رمضانية جميلة، والإثنين 12 رمضان هيكون فيه حفلة للمنشد حسام صقر، والأربعاء 14 رمضان هيكون فيه حفل غنائي لفرقة المركز القومي للمسرح والموسيقى والفنون الشعبية.

ونروح ليوم الخميس 15 رمضان وهيكون فيه يومها قراءات في الشعر الصوفي، وبعدها حفلة لفرقة زين محمود، والسبت 17 رمضان الشيخ جمال سالم، والثلاثاء  19 رمضان فرقة الشيخ جودة، والثلاثاء 20 رمضان فرقة الشيخ إيهاب يونس، والأربعاء 21 رمضان حفل غنائي لفرقة المركز القومي للمسرح والموسيقى والفنون الشعبية، والخميس 22 رمضان قراءات في الشعر الصوفي وبعدها حفلة لفرقةة بردة البوصيري.

أما يوم الجمعة من كل أسبوع فهيكون فيه عروض الأراجوز وخيال الظل، والأحد من كل أسبوع تقدروا تحضروا عروض فرقة النيل للآلات الشعبية.

 

مركز طلعت حرب الثقافي

في مركز طلعت حرب الثقافي اللي في السيدة زينب، هيكون فيه عرض لمسرحية الليلة الكبيرة يوم السبت 10 رمضان، والعرض ده هيستمر لغاية 15 رمضان، كمان يوم الخميس 15 رمضان هيكون فيه صالون ثقافي بعنوان “مشروع للمستقبل”، للكاتب محمد الشافعي.

والسبت 17 رمضان صالون بهجة الروح بصحبة كورال المركز، والثلاثاء 20 رمضان حفل للأطفال وذوي الاحتياجات الخاصة وعرض الأراجوز وخيال الظل، وكمان فيه ورش فنية كل يوم من 10 إلى  20 رمضان من الساعة 8:30 مساءً.

  

قصر الأمير طاز
يوم الأحد 11 رمضان هيكون فيه صالون “مصر المبدعة” مع الشاعر محمد بهجت وفرقة المصطفوية، وكمان افتتاح معرض “أماكن وتراث” وكمان هيكون فيه مرسم للفنانين، وما يفوتكمش كمان معرض “مآذن وأجراس” بالتعاون مع الجهاز القومي للتنسيق الحضاري وهيستمر لـ20 رمضان، والخميس 15 رمضان فيه حفل فني “رموز رمضان زمان”، والثلاثاء 20 رمضان فيه حفل لفرقة مدرسة الإنشاد الديني.
ومننساش أن القصر موجود في منطقة الدرب الأحمر.

  

مركز الإبداع الفني

ومقره الأوبرا هيعرض مسرحية “سلم نفسك”، من الخميس 8 رمضان حتى 19 رمضان.

 

بيت الشعر

ومكانه منزل الست وسيلة خلف مسجد الأزهر وبجوار زينب خاتون، هيقدم يوم الأحد 11 رمضان أمسية “قراءات من الشعر الصوفي”، والأحد 18 رمضان أمسية “قراءات من الشعر الصوفي”، والأحد 25 رمضان “صالون الشاعر أحمد عبد المعطي حجازي”.

سهرة رمضانية سعيدة يا أهل القاهرة!