The Definitive Guide to Living in the Capital , Cairo , Egypt

في العادة بيعتبر شهر رمضان موسم درامي مميز سواءً لصناع الدراما أو النقاد أو المشاهدين، وفي العادة ونتجة اختلاف الأذواق والأعمار، دايماً بنلاقي الأعمال الدرامية المعروضة في الموسم ده بتتنافس لجذب أكبر عدد ممكن من المشاهدين، وبالتالي تفوز بأكبر نسبة مشاهدة.

وبما إن التنافس كبير، والأذواق مختلفة، فدايماً هنلاقي عشرات القصص في الأعمال اللي بيقدمها النجوم، لكن ومع ذلك بتفضل الأعمال الكوميدية هي الأقرب لينا ولحياتنا الواقعية، ويمكن علشان كده الأعمال الكوميدية مؤخرًا بقى ليها نصيب من الموسم الدرامي الرمضاني.

ورغم إن كم الأعمال الكوميدية مقارنةً بغيرها من الأعمال اللي بتتقدم في شهر رمضان يعتبر قليل، إلا إن عيلة الفنان “سمير غانم” بتسيطر على جزء كبير من الأعمال الكوميدية دي، فهنلاقي مثلًا إن الفنانة “دنيا سمير غانم” طلت علينا في رمضان ده بمسلسلها الكوميدي الجديد “بدل الحدوتة 3”.

وهو مسلسل حلقاته منفصلة متصلة، وفيه 3 حكايات متنوعة، لكن كل قصة أو حكاية بتتفرد في 10 حلقات، واللي بتبتدي بمساعدة البطلة وفريقها في إنقاذ علاقة عاطفية يستحيل استمرارها.

وخلال أحداث المسلسل، هترجع “دنيا سمير غانم” علشان تقدم شخصية “لهفة” اللي لعبتها قبل كده في مسلسل “لهفة” بناءً على طلب جمهورها، وهيظهر معاها خلال الحلقات أبوها الفنان سمير غانم ووالدتها الفنانة دلال عبد العزيز.

أما “إيمي سمير غانم” فهتلعب دور جديد عليها في مسلسلها الجديد “سوبر ميرو” واللي هي شخصية “أميرة” البنت اللي بتشتغل في واحدة من المؤسسات الصحفية، لكن طموحها دايمًا إنها تبقى بطلة خارقة أو سوبر هيرو علشان تساعد نفسها والجميع.

العمل ده بيشاركها في بطولته الفنان “حمدي الميرغني” وهيظهر فيه الفنان “سمير غانم” برده، وهيلعب دور والدها اللي بيعاملها زي طفلة صغيرة وبيخاف عليها بشكل كبير.

وفي ظل المنافسة العائلية المستمرة قرر حسن الرداد تقديم مسلسل منفصل بعيد عن زوجته إيمي سمير غانم، وبيطل علينا السنة دي بمسلسله الجديد “الزوجة الـ 18” الذي بيشاركه بطولته ناهد السباعي ومحمود البزاوي.

المسلسل الكوميدي بيقدم من خلاله حسن الرداد شخصية “حمزة” متعدد الزيجات، الذي بيتجوز أكتر من مرة لحد ما بيوصل للزوجة رقم 18 اللي بتغير حياته.