The Definitive Guide to Living in the Capital , Cairo , Egypt

مش إلك دعوة، الله الوكيل، مش إلك حل، تيجي حدانا، عبارات خاصة بأهالي محافظة الشرقية، اللي لهجتهم حققت نجاح كبير في الفترة الأخيرة، وناس كتير بدأت تتعرف عليها، وفي الفترة الأخيرة نجح شاب مصري من أبناء الشرقية في جذب اهتمام مستخدمين كتير على الفيسبوك، عن طريق فيديوهات بيتسخدم فيها لهجة الشرقية الجميلة، في السطور الجاية هنعرفكم أكتر على الشاب ده.

اسمه سيد نافع، عمره 29 سنة، من مركز ههيا محافظة الشرقية، وهو مهندس مدني في العاصمة الإدارية الجديدة، اتخرج من كلية الهندسة جامعة الزقازيق، وبيقول لـ كايرو 360 إن موضوع صناعة فيديوهات على فيسبوك بدأ بالصدفة البحتة.

سيد بيكتب شعر من 8 سنين، وكل الشعر اللي كتبه قبل كده كان بالعامية المصرية.

من 3 شهور كتب نافع قصيدة عنوانها “مش إلك دعوة بيا علاوله”، (ملكيش دعوة بيا خالص)، والقصيدة بالكامل باللهجة الشرقاوية، وصورها فيديو ونزلها على صفحته على الفيسبوك، وخلال أسبوع واحد الفيديو ده عدى المليون مشاهدة، والناس بدأت تبعت له تسأل عن معاني الكلمات المميزة عند أهالي الشرقية، وقرر أنه يعمل فيديو تاني يكون فيه شرح للكلام خاصة الكلمات اللي مش معروفة، ومن هنا بدأت حكاية الفيديوهات مع سيد نافع.

هدف سيد من الفيديوهات اللي بينشرها على صفحته الرسمية على الفيسبوك هو توصيل رسالة لنوعين من الناس، أولهم اللي من الشرقية وبيتكبروا على لهجتهم، وبيفضلوا عدم الحديث بيها، وشايفين إنها لهجة مش متحضرة وقديمة ومتناسبش العصر الحديث. أما النوع الثاني فهو الناس اللي نفسهم يتكلموا باللهجة دي بس خايفين من تريقة الناس عليهم، أو مش عارفين يتكلموا اللهجة صح، وعلشان النوع ده عمل سيد سلسلة فيديوهات لتعيلم لهجة الشرقية للمبتدئين.

نجاح الفيديوهات كان له صدى واسع، وبيؤكد سيد أن رد الفعل على الفيديوهات كان ايجابي جدًا، وأنه وهو في شغله في العاصمة الإدارية معاه ناس من كل محافظات مصر، وفرجهم الفيديو علشان يعرف رأيهم، وكل اللي اتفرج عليه حبه جدًا، واتكلموا معاه كمان أنهم عاوزين يتعلموا اللهجة الشرقاوية، وفيه ناس بالفعل بدأت تتكلم بيها، لإن اللهجة الشرقاوية سهلة.

صفحة سيد على فيسبوك فيها حوالي 100 ألف معجب، و128 الف متابع.

سيد بيعشق التمثيل، وبيتمني يبقى ممثل ناجح الفترة الجاية، وبيقول إنه عمل صفحته على الفيسبوك علشان يوصل للهدف ده.

بنتمنى لسيد نافع يحقق كل أحلامه، ويبقى ممثل ناجح، خصوصًا إن الفيديوهات الخاصة بيه بتؤكد إنه فعلًا شخص موهوب جدًا.

لزيارة صفحة سيد نافع اضغطوا هنا.