The Definitive Guide to Living in the Capital , Cairo , Egypt

من أيام قليلة، غاب عن دنيتنا “عم صابر” اللي كتير مننا دلوقتي بيسأل يبقى مين عم صابر؟ لكن لو قلنا غابت عننا “ضحكة الأراجوز” فأكيد كلنا هنفتكره، عم صابر المصري، شيخ الأراجوزية وصانع الحكايات.

والنهارده جينا نقولكم على 5 حاجات كنا أول مرة نعرفها عن عم صابر.. تعالوا نحكيهالكم:

1- عم صابر المصري اسمه الحقيقي “مصطفى عثمان” وهو من مواليد القاهرة سنة 1935 ( 72 سنة) ويعتبر أشهر لاعب أراجوز في الوطن العربي، لكن لحد النهارده ماحدش يعرف ليه اختار اسم صابر بدل اسمه الحقيقي.

2- بداية عم صابر مع الأراجوز كانت على شجرة قعد يتفرج من عليها على عرض الأراجوز اللي كان بيقدمه ساعتها الفنان الراحل “محمود شكوكو” في الكيت كات، ونجح بعد فترة إنه يبقى مساعد ليه، في وقت كان معظم فنانيين الأراجوزات بدأوا يسيبوا المهنة، ويتجهوا للمسرح.

3- قعد عم صابر يتنقل مع أراجوزه بين موالد مصر علشان يتعلم الفن ده على إيد كبار لاعبي الأراجوز، في شارع محمد علي، لحد ما بقى لاعب أراجوز محترف، ولف مع أراجوزه في صولات وجولات وعروض في أكتر من 22 دولة عربية وأوروبية، وكان من حبه في الأرجوز بيقول دايمًا: “بتاع الأراجوز اللي بجد ممكن يخش البرفان ميطلعش منه إلاّ تاني يوم، من كتر الشغل”.

4- شارك مع د.نبيل بهجت – أستاذ المسرح في جامعة حلوان- من أكتر من 20 سنة في تأسيس فرقة (ومضة) لفنون خيال الظل والأراجوز، وكان ليه فضل كبير في المحافظة على الفن الشعبي ده، وقبول ملف مصر في اليونسكو لاعتبار “الأراجوز” والدمى التقليدية المصرية في قوائم التراث العالمي.

5- الأراجوز كان سبب في رجوع الفنان العالمى “عمر الشريف” للسينما المصرية تاني بعد غياب طويل، وده كان بسبب فكرة عرضها عليه المخرج “هانى لاشين” فى نهاية الثمانينات، واتحمس لها عمر الشريف جدًا وقرر يبدأ تصويرها فوراً علشان يطلع لنا فيلم “الأراجوز” اللي بيعتبر رائعة من روائع السينما المصرية.

الشخصية اللي لعبها عمر الشريف في الفيلم هي شخصية “محمد جاد الكريم” وكان دايمًا شايل برافانه وحكاياته وابنه “بهلول” على ضهره، وبيلف بيهم فى قريته مع أراجوزه، في محاولة لتوعية الناس ومحاربة الفساد من خلال بساطة مهنته وقوة تأثيرها على الناس.