The Definitive Guide to Living in the Capital , Cairo , Egypt

فن وثقافة

على أرض القاهرة.. 10 أحداث فنية وثقافية سنوية ماينفعش تفوتهم

القاهرة سينما كتاب كوميكس معارض القاهرة معرض مغنى مهرجان مهرجانات القاهرة موسيقى
على أرض القاهرة.. 10 أحداث فنية وثقافية سنوية ماينفعش تفوتهم
بواسطة
Mohamed Talaat

القاهرة عاصمة الفن والثقافة، مش بس في مصر، لكن في العالم العربي كله، وبمناسبة مرور 10 سنين على انطلاق كايرو 360، هنقدم لكم سلسلة مقالات بطلها هو رقم 10، والمقال الأول هنجمع لكم فيه 10 مهرجانات ومعارض بتحصل كل سنة في القاهرة، بتثبت إن عاصمتنا الجميلة هي أرض الفن والثقافة.. يلا نبدأ.

مهرجان القاهرة السينمائي الدولي

هو مهرجان سنوي بيتم تنظيمه في القاهرة، بدأ سنة 1976، وبيعتبر أول مهرجان دولي سينمائي في الوطن العربي، واتأسس بمجهود من الجمعية المصرية للكتاب والنقاد السينمائيين، وأول رئيس للمهرجان كان الكاتب الكبير الراحل كمال الملاخ، وحصل مهرجان القاهرة السينمائي الدولي على ثاني أهم مهرجان بعد مهرجان لندن من الاتحاد الدولي لجمعيات المنتجين السينمائيين.

المهرجان فرصة رائعة لكل عشاق السينما، وبيقدم أفلام مميزة من كل الثقافات والدول.

معرض زهور الربيع

وده معرض سنوي متخصص في النباتات، وبيعتبر من أكبر معارض الزهور المفتوحة في العالم كله، وفيه هتلاقوا كل اللي ممكن تحتاجوه من زهور ونباتات نادرة، ومستلزمات زراعة، والمعرض اتأسس سنة 1933، وبيستمر المعرض أكتر من شهر، وغالبًا بيكون في مارس من كل سنة.

معرض القاهرة الدولي للكتاب

في 1969 كانت الدورة الأولى لمعرض القاهرة الدولي للكتاب، واللي أسسته الأديبة الكبيرة الراحلة سهير القلماوي، والمعرض بتشارك فيه دور نشر من أغلب دول العالم، وبتكون فيه إلى جانب ملايين الكتب، ورش وندوات مهمة، ده غير حفلات التوقيع، وغالبًا المعرض بيكون في شهر يناير من كل سنة.

المعرض بيقام حاليًا في القاهرة الجديدة.

مهرجان الموسيقى العربية

من أعظم وأرقى المهرجانات اللي بتقام كل سنة في القاهرة، وكانت أول دورة له في 1991، وبيهدف للحفاظ على الذوق العام للموسيقى، وبيشارك في المهرجان مجموعة مهمة من الفنانين المصريين والعرب وبيحضروا عدد كبير من عشاق الموسيقى من كل مكان.

مهرجان القاهرة الدولي لسينما المرأة

مهرجان القاهرة الدولي لسينما المرأة بدأ كمبادرة من مجموعة نساء لطرح الأفلام المستقلة اللي صنعتها سيدات من مصر ومن دول تانية، وكانت الدورة الأولى له سنة 2008، والبداية كانت عبارة عن قافلة “سينما المرأة العربية واللاتينية”، لكن تطور الأمر وأصبح مهرجان دولي مختص بسينما المرأة.

المهرجان بيعرض أفلام مهمة جدًا، وبيكون فرصة كبيرة لعشاق السينما للتعرف على نساء بيشتغلوا في مجال السينما وصناعة الأفلام.

مهرجان القاهرة للمسرح التجريبى

هو مهرجان مسرحى دولي، دورته الأولى كانت سنة 1988، وهو متخصص في تقديم العروض المسرحية المميزة من كل أنحاء العالم، وده من خلال لجنة متخصصة بتختار أفضل العروض، وبيتم تكريم أفضلها مع أفضل ممثل وأفضل مخرج، وأفضل ديكور وإضاءة، وكمان بيكون فيه ندوات مختلفة.

مهرجان القاهرة للجاز

هو مهرجان دولي هدفه توصيل موسيقى الجاز لقطاع أكبر من الجماهير، وبيدي الفرصة لعرض موسيقى الجاز بكل ألوانها وبيكون بمشاركة عالمية ومصرية، وكانت الدورة الأولى للمهرجان في سنة 2009، وهو فرصة ممتازة لكل الموسيقيين الشباب علشان يقدموا موهبتهم في أجواء جماهيرية.

مهرجان سماع الدولي

بيهدف المهرجان اللي انطلق سنة 2007 لتنمية الإنسان فكريًا وثقافيًا وفنيًا من خلال ثقافات وفنون العالم المختلفة، وهدف المهرجان إنه يكون رسالة سلام لكل العالم من خلال الموسيقى، وبيحضر المهرجان سنويًا عدد كبير من عشاق الموسيقى، وبيشارك فيه عشرات الفنانين من مصر والعالم.

مهرجان القلعة الدولي للموسيقى والغناء

نقدر نقول إن مهرجان القلعة الدولي للموسيقى والغناء، هو البديل لليالي التليفزيون اللي كانت بتحصل في مصر من سنين طويلة، وانطلق المهرجان لأول مرة سنة 1991، وبيضم خلطة مميزة من الفنانين المعروفين مع فرق أندر جراوند، وبيقام كل سنة في قلعة صلاح الدين في منطقة الإباجية، وسعر التذكرة بيكون رمزي جدًا، علشان أكبر عدد من الجمهور يقدر يحضر الحفلات ويستمتع بأغاني أهم النجوم والفرق الشبابية.

مهرجان الكوميكس

وده مهرجان مخصص للقصص المصورة، وبيعتبر ملتقى لمحبي ومنتجي الكوميكس في مصر، وبدأ فعالياته سنة 2015، والمهرجان بيكون فرصة كبيرة لتعارف صناع الكوميكس.

مقترح