The Definitive Guide to Living in the Capital , Cairo , Egypt

فن وثقافة

“أنا مش محظوظ أنا عافرت 12 سنة قبل ما اتشهر”.. حوار مع علي ربيع

الفنان علي ربيع حسن وبقلظ حوارات كايرو 360 علي ربيع مسرح مصر
“أنا مش محظوظ أنا عافرت 12 سنة قبل ما اتشهر”.. حوار مع علي ربيع
بواسطة
Cairo 360

كتبت:سارة  نبيل

قدر علي ربيع إنه يدخل قلوب الملايين ببساطته وخفة دمه، وعلى الرغم من إن الناس اتفاجئت بنجاحه وتقديمه بطولات سينمائية وتليفزيونية، إلا أن النجاح ده كان قبله سنين تعب ومعافرة من أول ما دخل الجامعة، علشان كده كان لازم نعرف منه خطوات المشوار ده وكمان نعرف شوية أسرار عن أول حب في حياته وعن مراته ووالده وطفولته، وحاجات تانية كتير هنعرفها في الحوار دا.

فيه ناس كتير شايفة إنك محظوظ وبقيت بطل فجأة وبمجرد شهرتك في مسرح مصر بقيت نجم شباك..رأيك إيه في الكلام ده؟

أنا بمثل من وأنا في سنة أولى في كلية التجارة وقعدت 5 سنين في الجامعة بعمل عروض مسرحية وأدخل مسابقات مع فرقة المسرح، وبعد التخرج اشتغلت 4 سنين في مركز الإبداع، وبعد كدا قعدت سنتين بعمل أدوار صغيرة في أعمال مسرحية على كل مسارح القاهرة تقريباً وبعد كدا اشتغلت في “مسرح مصر”، يعني فيه 12 سنة معافرة محدش خد باله منهم، وأنا مكنتش حاطط في دماغي إني أكون نجم، لأني في الجامعة كنت بمثل عشان استمتع وأعمل اللي بحبه، وحتى لما احترفت التمثيل واشتغلت في مركز الإبداع كنت بعمل اللي بحبه وعايز لما أمثل مع ناس كتير أكون أحسن واحد فيهم.

إنشغالك في التمثيل هو سبب سقوطك في الجامعة..فاكر رد فعل والدك كان إزاي وقتها؟

من صغري بابا كان بيقولي إعمل اللي إنت عايزه طالما هتبقى مبسوط فيه، وفعلاً لعبت كورة وطايرة ويد ومصارعة روماني، وكل حاجة كنت بحبها كنت بجربها، وسنة رابعة تجارة عدتها على مادتين بس وكان دا أول سقوط في حياتي عشان كدا رد فعل بابا مكنش عنيف أوي.

اتعرضت لمشكلة تسريب فيلم “حسن وبقلظ” اللي كان  أول بطولة مطلقة ليك في السينما بعد يومين بس من عرضه…كلمنا عن المشكلة دي وحاولت تحلها إزاي؟

زعلت جدا لما اتسرب الفيلم وكتبت عالفيسبوك أطلب من الناس إن محدش يعمله Share عشان مجهودنا ميضيعش عالفاضي، بس إتفاجئت بتعليقات غريبة من الناس، فمثلاً فيه واحد قاللي “هو إنت يعني كنت بتدخل تشوف الأفلام في السينما زمان؟ ” فقررت أسكت ومردش.

إيه حقيقة إنك كنت أعلى أجر بين نجوم جيلك لما عملت أول بطولة ليك وعشان كدا متكررتش التجربة تاني؟

الكلام ده مش حقيقي أنا أقل واحد خد فلوس في فيلم “حسن وبقلظ” ومش عايز أقول أنا خدت كام بس فعلاً أنا أقل أجر في كل اللي اشتغلوا في الفيلم، بس أنا مكنش هاممني الفلوس أنا عجبتني الفكرة وقلت هعملها ومش مهم الفلوس اللي يهمني إن الفيلم ينجح لما ينزل ويحقق إيرادات أعلى من اللي حققها لأني تعبت فيه 8 شهور عشان كدا زعلت جداً لما اتسرب على لنت.

الشهرة الكبيرة اللي حققتها في الفترة الأخيرة غيرت فيك إيه؟

الحمد لله متغيرتش خالص لإن اللي عنده أصل مش بيتغير، وأنا لسة بعمل كل حاجة اتعودت أعملها زمان بس الفرق إني بعملها وسط زحمة ولمة حلوة من الناس اللي بيحبوني ودي نعمة من ربنا، ومش المفروض أتغير بسبب دا واللي بيتغير دا مترباش ومحدش علمه الصح، فلما بيبقى نجم “بيتهطل” ومبيبقاش عارف بيعمل إيه.

ناس كتير قالت إنك زعلت من الزعيم عادل إمام لما مرة هزر معاك عالهوا في برنامج وقال عليك “عبيط”…هل زعلت فعلاً؟

لا خالص أستاذ عادل بيحبني جداً وبيهزر معايا دايماً كدا ولما كنا بنصور مع بعض كان الوحيد اللي أول ما يروح البلاتوه يسأل عليه ويطلب يقعد معاه هو أنا، وكلمة عبيط دي قصده بيها “دمه خفيف” مش قصده إني مش بفهم زي ما الناس افتكرت، وأنا بحبه جداً وزعلت إن الناس دخلت شتمته عالفيسبوك بس في نفس الوقت انبسطت إن فيه ناس كتير بتحبني وفي ضهري لو حد ضايقني مش هيسيبوه مهما كان مين.

فاكر أول قصة حب عيشتها وإنت صغير؟

اه طبعاً، كنت بحب زميلتي في الجامعة وقعدت فترة طويلة أوصلها البيت وأوديها الجامعة وأروح معاها كل مكان وكان ممكن أوصلها بيتها وأرجع البيت مشي عشان مش معايا فلوس تكمل أركب تاني، ولما اعترفت لها بحبي صدمتني وقالت لي إحنا إخوات، فزعلت جداً وقعدت فترة زعلان بس قررت أفضل أتعامل معاها وأوصلها برضه كل مكان.

ولما قررت إنك تتجوز فكرت كتير؟

لا خالص بالعكس والحمد لله ربنا كرمني بمراتي “ندى” وكتبنا كتابنا بسرعة بعد الخطوبة بفترة قصيرة جداً، وهي طيبة وجدعة وبدعي ربنا إننا نكمل حياتنا مع بعض.

مقترح