في ذكرى رحيل أديب نوبل.. كل اللي محتاجين تعرفوه عن متحف نجيب محفوظ
تكية أبو الدهب ذكرى رحيل نجيب محفوظ طريقة الوصول لمتحف نجيب محفوظ عنوان متحف نجيب محفوظ متاحف في القاهرة متحف نجيب محفوظ
Mohamed Talaat
إمبارح، كانت ذكرى وفاة نجيب محفوظ، الكاتب المصري العالمي اللي حقق نجاح غير مسبوق في مجال الأدب العربي، وهو الأديب المصري العربي الوحيد اللي حصل على جائزة نوبل في الأدب .
محفوظ اتولد في 11 ديسمبر من سنة 1911 ورحل عن عالمنا في 30 أغسطس من سنة 2006، وده بعد ما ساب وراه إرث كبير من الفن والإبداع.
تعالوا نتعرف أكتر على أجمل متحف ثقافي في القاهرة، وهو متحف نجيب محفوظ الموجود داخل “تكية أبو الدهب” بالقاهرة الفاطمية.
هتشوف إيه في المتحف؟
متحف نجيب محفوظ بيعرض بشكل جديد ومختلف مجموعة من متعلقات أديب نوبل الشخصية، وده بعد ما وجهت الجهات المسؤولة عن المعرض الدعوة لمؤسسات وأفراد علشان يهدوا أي حاجة يمتلكوها من مقتنيات “نجيب محفوظ” لضمها للمعرض.
المتحف بيتكون من دورين، الدور الأول فيه قاعات للندوات، ومكتبة سمع بصرية، ومكتبة عامة، ومكتبة نقدية بتضم أهم الأبحاث والدراسات عن أعمال “نجيب محفوظ”.
أما الدور الثاني فبيضم جناح للأوسمة والشهادات اللى حصل عليها “محفوظ”، وجناح تاني لمتعلقاته الشخصية، مع بعض الأوراق بخط ايده، وقاعة تالتة بتضم جميع أعمال أديبنا الكبير بطبعاتها القديمة والجديدة، والأعمال المترجمة، ده غير قاعة للسينما.
مؤلفات من إسبانيا وتشيلي وكولومبيا
المتحف بيضم كمان عدد من مؤلفات أصلية للكُتاب العالميين الحاصلين على جائزة نوبل، زي الكتاب الأسبانيين: خوسيه أنتيجاري، خاسيتنو بينانيتي، بيثته إلكسناندري، وخوان رامون خمينيث.
ده غير مجموعة مهمة من المؤلفات لأهم كتاب نوبل من تشيلي، ومنها مؤلفات الكاتبة جابرييلا ميسترال، بالإضافة كمان لأعمال الكاتب الكولومبي الكبير جابريل جارثيا ماركيز.
إزاي تروح المتحف؟
موقع المتحف في القاهرة القديمة، وتم اختيار الموقع ده بعناية شديدة، لإن منطقة الأزهر والحسين شهدت كتير من أحداث روايات نجيب محفوظ العظيمة زي: زقاق المدق وقصر الشوق والسكرية وغيرها من الروايات.
عنوان المتحف: شارع التبليطة بجوار جامع الأزهر، أمام وكالة الغوري، الدرب الأحمر.
ساعات العمل: من 9 صباحًا إلى 5 مساءً.
تليفون: 0227357001
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
