كشك ذيع موهبتك.. فرصتك علشان تطلع مواهبك الدفينة
Mohammed Sabry
كتب: محمد صبري
من ضمن أحداث شهر فبراير، تحديدًا يوم السبت 18 فبراير 2017. كان في إيفينت في الحسين اسمه “كشك ذيع موهبتك”. وهو عبارة عن كشك بيلف محافظات مصر، بيدي الفرصة لكل واحد عنده موهبة إنه يذيعها من خلاله. بعدين بتدخل في منافسة مع مواهب من محافظات تانية. وفي النهاية بيكون في فائز كل أسبوع. بس يا ترى إيه قصة الكشك ده؟
الحدوتة بدأت من 4 سنين، لما مجموعة من الشباب فكروا إنهم يذيعوا مواهب كل المصريين على التليفزيون. وبما إن القنوات مافيهاش فرصة لكل الناس. قرروا يعملوا كشك صغير ويلفوا به مصر كلها. كل واحد بيدخل الكشك يغني أو يقول شعر أو يتكلم في أي موضوع. وبيكون في كاميرا بتسجل وبتعرض للناس اللي بره الكشك. وكمان عملوا كشك “ذيع أنت” في لبنان.
من هنا اتولدت فكرة برنامج “ذيع موهبتك”، وقرروا يعيدوا التجربة مع Tube Star Network (شركة إنتاج برامج). بس المرة دي بيكتشفوا المواهب، وبيعملوا منافسة بينهم. علشان مؤمنين إن في مواهب تستاهل فرصة الظهور للجمهور. وبالفعل التجربة نجحت ودلوقتي وصلوا للموسم الثالث من البرنامج.
الكشك بيلف مصر كلها، فانت مش محتاج تروح له حتة. هو هييجي لحد عندك. وبيقدم الإيفينت بتاعهم الفنان أحمد الجارحي.
تقدروا تتابعوا صفحتهم من هنا. أو تدخلوا على الموقع علشان تعرفوا إزاي تشتركوا من هنا.
يلا بقى، كله يستعد ويطلع المواهب المدفونة.