The Definitive Guide to Living in the Capital , Cairo , Egypt

واحدة من المشاكل اللي بتعاني منها القرى في أغلب المحافظات المصرية هي غياب المراكز الثقافية والمكتبات اللي بتوفر أحدث وأهم الكتب للمهتمين بالثقافة من أبناء القرى دي.. ودي المشكلة اللي بيحاول مشروع كشك “كتابك” يحلها في الفترة الجاية.. تفاصيل أكتر عن المشروع الثقافي المهم ده في السطور الجاية.

مؤخرًا، افتتحت الدكتورة إيناس عبد الدايم وزيرة الثقافة والدكتور هيثم الحاج علي رئيس الهيئة العامة للكتاب مشروع كشك “كتابك” في ساحة دار الأوبرا، لبيع الكتب، والهدف من الكشك ده هو عرض وبيع إصدارات قطاعات وزارة الثقافة. لكن المشروع ده مش هيكون موجود في ساحة دار الأوبرا بالقاهرة وبس.. ده هيسافر لقرى مصرية مختلفة في مهمة ثقافية عظيمة.

وقال الدكتور هيثم الحاج علي إن مشروع كشك “كتابك”، واحد من الأفكار اللي بتدخل بيها وزارة الثقافة مبادرة حياة كريمة، والكشك ده هيكون متواجد في قرى المبادرة بشكل دائم، وأن المنفذ اللي تم افتتاحه مؤخرًا في ساحة دار الأوبرا المصرية، مجرد نموذج مبدئي للفكرة دي.

أكشاك “كتابك” هيقوم بإدارتها أبناء قرى حياة كريمة، لخلق فرص عمل لهم، والهدف من المشروع هو رفع درجات الوعي، والتنشيط الثقافي، وترويج الكتب الرخيصة واللي سعرها بيبدأ من جنيه وبتوصل لحد 20 جنيه.

تفاصيل أكتر عن كشك “كتابك”

مشروع كشك “كتابك” بيستهدف توطين المعرفة في القرى اللي هيتم تأهليها، إيمانًا من الدولة المصرية الجديدة بنشر المعرفة الإنسانية وتعزيز قيم الثقافة المصرية الأصلية وبناء الشخصية الوطنية، بالإضافة إلى أن توطين الثقافة بأفرعها المختلفة بوصفها صناعة قادرة على توفير فرصة عمل لأبناء القرى دي.

كمان بيهدف المشروع لتوفير محتوى ثقافي يخاطب الشرائح العمرية المختلفة، ويكون منتقى بعناية من أجل نشر الأفكار البناءة ومحاربة الأفكار المتطرفة وتصويب المفاهيم عند شباب القرى المصرية، والمساعدة في تكوين وعي أجيال الأطفال في القرى دي.

المشروع هيساهم بدرجة كبيرة في توزيع كتب الهيئة العامة المصرية للكتاب ومطبوعات الجهات المعنية بالنشر بوزارة الثقافة، زي الهيئة العامة لقصور الثقافة والمركز القومي لثقافة الطفل وكتب مختارة من إصدارات دور النشر الخاصة هتشرف على اختيار عناوينها الهيئة المصرية للكتاب، وهيتعاون اتحاد الناشرين في توفير كل اللي هيتم اختياره من إصدارات دور النشر ضمانًا للمحتوى المعرفي المستهدف والملائم لطبيعة الثقافة المحلية.