The Definitive Guide to Living in the Capital , Cairo , Egypt

فن وثقافة

لعشاق الكتابة الأدبية.. إزاي تنشر كتابك وتبدأ رحلة النجاح؟

انشر كتابك دار حروف للنشر روايات مسابقة أدبية
لعشاق الكتابة الأدبية.. إزاي تنشر كتابك وتبدأ رحلة النجاح؟
بواسطة
Mohamed Talaat

الفترة دي ناس كتير قررت تحمي نفسها من فيروس “كورونا” المستجد عن طريق العزل المنزلي، لكن القعدة في البيت مش معناها أبدًا انك تأجل نجاحك.. ممكن تستغل الفترة دي وتشتغل على كتاب جديد وتنشره مع دار نشر مصرية بتبحث عن شباب موهوب علشان تتبناه أدبيًا.

مؤخرًا أعلنت دار حروف للنشر والتوزيع، وهي دار نشر مصرية حديثة، عن مسابقة هدفها الارتقاء بالأدب، وبيتم من خلالها توفير فرصة حقيقية للمبدعين في مجال الكتابة الأدبية في كل مجالاتها، وهتقوم الدار بنشر الأعمال الفائزة علي نفقتها كاملة من غير ما يتحمل الكاتب ولا مليم.

وشروط المسابقة هي:

تقديم الأعمال الروائية في ملف وورد ولازم تكون كاملة، كمان لازم يتم تقديم ملف تاني بيحتوي على السيرة الذاتية للمؤلف، وصفحته الشخصية، وكيفية التواصل معاه، وإقرار من الكاتب بالموافقة علي عرض العمل على لجنة القراءة، وإقرار تاني بأن العمل من تأليفه وأنه ماقمش بنشره قبل كده، وكمان تعهد بعدم عرض العمل على أية جهة تانية قبل ظهور نتيجة المسابقة.

الدار بتشترط كمان إن الأعمال تكون بالفصحى، لكن ممكن الحوار نفسه يكون بالعامية.

وتقدروا تقدموا أعمالكم في الفترة من 10/4/2020 ولحد 10/5/2020، وهيتم الرد على جميع الطلبات خلال شهر من إرسالها، وهيتم تقييم الأعمال عن طريق لجنة قراءة متخصصة.

تقدروا تبعتوا أعمالكم على الإيميل ده: ektebhorof@gmail.com

وممكن تتواصلوا مع الدار من خلال صفحتهم الرسمية من هنا.

فريق كايرو 360 بيتمنى لكم التوفيق والنجاح.

مقترح