متحف “محمد عبد الوهاب”.. رحلة مصورة لزمن الطرب الأصيل
CNN صورة متحف محمد صالح محمد عبدالوهاب مقتنايات موسيقار الأجيال
Omar Abd-elmaqsoud
حتى لو كنت من مواليد إمبارح، مستحيل مايكونش عدى على ودنك قبل قلبك لحن اتعزف على أوتار عود “محمد عبد الوهاب” أو سمعت صوته في مطلع أغنية، يمكن من كتر ما هي قديمة مش قادر تميز كلماتها، لكن بتفضل كلمات من أغانيه موجودة دايمًا في الذاكرة، وبتيجي على بالنا من وقت للتاني لحد النهارده، أومال هما قالوا عليه موسيقار الأجيال ليه؟
وتخليدًا لذكراه وألحانه وفنه وطربه الأصيل اللي لفوا الشرق الأوسط والعالم العربي كله، وفي 4 يونيو سنة 2002 تم افتتاح متحف خاص بمقتنيات “عبد الوهاب” في المعهد العالي للموسيقى العربية في شارع رمسيس في وسط البلد، وبيوثق المتحف وبيحكي مراحل حياة عبد الوهاب المختلفة ، ومن لحظة دخوله، هتحس كإنك دخلت من بوابة زمنية نقلتك لزمن الطرب الأصيل.
موقع CNN العربية، اتكلم مع الفنان المصري المصور “محمد صالح” اللي قرر إنه يقدم لنا مشروع مصور بلغة يفهمها العالم كله، لغة الفن والصورة، وقرر يوثق متحف عبد الوهاب بالكامل من خلال صور التقطها بعدسته.
محمد صالح وثق بعض أبرز القطع الخاصة بمسيرة موسيقار الأجيال زي آلة العود، وعصاية قيادة الأوركسترا، وغرفة الموسيقى اللي فيها البيانو الخاص بيه، وكرسيه الهزاز المصنوع من الخشب، ومكتبه، وجهاز الراديو الخاص بيه، بالإضافة لجائزة الإسطوانة البلاتينية اللي حصل عليها عبدالوهاب سنة 1978 كتكريم لمسيرته الفنية، وكانت أول تكريم لفنان عربي من النوع ده.
المتحف بيضم أكتر من قاعة، أولها “قاعة الذكريات”، وفيها جناحين، الأول بيحكي عن نشأة محمد عبد الوهاب، وأولى خطواته نحو عالم الموسيقى العربية والسينما المصرية، وعلاقته بكبار الفنانين، بالإضافة إلى الجوائز والتكريمات اللي خدها.
الجناح الثاني بيضم عدد من الغرف الخاصة ببيت عبدالوهاب، زي غرفة نومه، ومكتبه الخاص، ومجموعة من قطع الأثاث المفضلة عنده، وشوية متعلقات شخصية.
المتحف عامل كمان قاعة مخصصة للاستماع والمشاهدة، بتضم مكتبة كاملة لأعمال عبد الوهاب من موسيقى، وأغاني وألبومات.
ممكن تتعرفوا أكتر على المصور “محمد صالح” وتتفرجوا على صوره ومشاريعه من خلال صفحته على الفيسبوك اللي هتلاقوها هنا.
عنوان متحف “عبد الوهاب”: معهد الموسيقى العربية، 22 شارع رمسيس، بجوار الإسعاف، وسط القاهرة.
رقم التليفون: 0020225763015.
مواعيد الزيارة: من الأحد إلى الخميس من الساعة 10 صباحًا إلى الساعة 3 عصرًا.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
