The Definitive Guide to Living in the Capital , Cairo , Egypt

فن وثقافة

مجانًا.. محتويات المكتبة الإلكترونية لمكتبة الإسكندرية متاحة للجمهور

بحث علمي قراءة كتب كورونا مكتبات مكتبة الإسكندرية
مجانًا.. محتويات المكتبة الإلكترونية لمكتبة الإسكندرية متاحة للجمهور
بواسطة
Omar Abd-elmaqsoud

مع التطورات السريعة اللي بيشهدها العالم الفترة دي، واللي البطل فيها هو انتشار فيروس كورونا المستجد.. بنشوف برده على الناحية التانية مبادرات ومواقف وإجراءات غيرت شكل العالم، وخلتنا بقينا أكثر وعي ودقة بالعالم حوالينا، وكتير من المبادرات دي بيقوم بيها أفراد زينا، ومنها اللي بتقوم بيها مؤسسات، وكل واحد حسب دوره بيحاول يقدم التوعية والتثقيف اللازم للمرحلة الحرجة اللي بنمر بيها على كوكب الأرض.

المكتبات عمومًا، ومكتبة الإسكندرية بشكل خاص، عليها دور كبير في المشاركة بإجراءات ومبادرات تخفف عن الناس وتفهمهم وتوعيهم، وفي نفس الوقت تشاركهم مخاوفهم.. ومن هنا أعلنت مكتبة الإسكندرية إنها هتدي لكل مستخدميها وروادها حق الوصول المجاني لنسخ كتبها وقرائتها الإلكترونية من خلال الموقع الرسمي للمكتبة على الإنترنت، كنوع من الإجراءات الوقائية والاحترازية للوقاية والحد من انتشار فيروس كورونا المستجد.

الخطوة دي أعلنت عنها المكتبة على صفحتها الرسمية على “الفيسبوك” وهدفها تشجيع الناس على القراءة في أوقات فراغها، وفي نفس الوقت مهم جدًا إننا نكون في بيوتنا، وبدون اختلاط بالناس إلا في حالات طارئة بس، ونتجنب الزحمة والتجمعات.

مكتبة الإسكندرية مكونة من مكتبة رئيسية، بالإضافة لـ 6 مكتبات متخصصة وهي: مكتبة الفنون والوسائط المتعددة، ومكتبة طه حسين لضعاف البصر، ومكتبة الطفل، ومكتبة النشء قسم التبادل والأرشيف، قسم الكتب النادرة، وأخيرًا المكتبة الفرنكوفونية اللي كانت إهداء للمكتبة من مكتبة فرنسا الوطنية.

لو في حالات خاصة للقراء والباحثين مضطرين يروحوا فيها للمكتبة بنفسهم، فالمكتبة هتقدم خدمتها بشكل جزئي، وقللت عدد الساعات اللي هتفتح فيها قاعة القراءة الكبيرة لـ 3 ساعات يوميًا بس، وهتبدأ من الساعة 11 الصبح لـ 2 الظهر، ما عدا الجمعة والسبت.

ممكن تستمتعوا بتجربة لطيفة، وجولة مفيدة في موقع مكتبة الإسكندرية من هنا.

مقترح