The Definitive Guide to Living in the Capital , Cairo , Egypt

بقلم: محمد حمدي

ممكن أنسى حاجات كتير. لكن مش هنسى إني كنت طفل صغير في مدينة مصرية صغيرة. لكن عقلي وروحي كان في شوارع ريو دي جانيرو في البرازيل. مشغول بمطاردة ظباط المخابرات الروسية لشخصية أدهم صبري في شوارع المدينة. اللي ماكنتش هازورها ولا هعرف حاجة عنها في سني الصغير ده. لولا المبدع نبيل فاروق. اللي لففنا العالم بجنيه ونصف. كان سعر (اللغز) صغير الحجم عظيم القيمة. واللي كان ممكن نسهر في الشوارع بانتظار وصوله من المطبعة.

الكتيب كان تصميمه بسيط. رسوماته بالأبيض والأسود، لكنه كان بريحة الحلم وطعم المغامرة. تتعلم فيه الانتماء لبلدك. واحترام تقاليد مجتمعك وتعاليم دينك. في وسط مغامرة ممتعة وشخصيات مرسومة باحترافية. كوكتيل غريب يشدك من أول سطر لأخر سطر. ويخلي طفل صغير يحوش من مصروفه يوم بعد يوم مستني الجملة السحرية: “الأعداد الجديدة جت”.

نبيل فاروق ظهر في فترة كنت فيها مُجبر – طالما بتحب القراءة- على الاختيار بين قصص الأطفال من نوعية (الصياد الماهر) و (المزارع الفصيح) وبين روايات بحجم ثلاثية نجيب محفوظ وأعمال يوسف إدريس. نبيل فاروق قدم لنا جسر يعبر بينا الفجوة الأدبية دي. ويمهد لنا الطريق لتكوين عادة هاتلازم –بعد كده- قطاع كبير من جيلي. عادة القراءة.

روايات رجل المستحيل وملف المستقبل وكوكتيل 2000 ماكانتش مجرد روايات مغامرات. لكنها كانت جرعة ثقافية مُركزة. وجبة أدبية على هيئة مغامرة ممتعة. خلت طفل في مقتبل حياته عنده معلومات عن السفر عبر الزمن ومعادلات النسبية وطريقة عمل أجهزة المخابرات وآلية تشغيل المفاعلات النووية!

وعلى صفحات الروايات وبعد نهاية المغامرة. كان بييجي وقت التواصل مع القراء. الدكتور نبيل أدار واحدة من أحسن عمليات التواصل مع القراء بالبريد التقليدي. وعيشنا تجربة السوشيال ميديا قبل سنين طويلة من ظهور فيسبوك وتويتر وقبل ظهور المنتديات والمدونات وحتى قبل ظهور الإنترنت!

علشان كده لما عرفت إن الدكتور نبيل فاروق رحل عن عالمنا. لازمني عدم التصديق لحد النهارده. وهيلازمني لفترة زمنية طويلة قادمة. إزاي يرحل اللي حببنا في القراءة ولففنا العالم وزرع جوانا حب البلد والانتماء لها؟ لكن هل فعلًا الدكتور نبيل فاروق رحل؟

رحل الجسد يا دكتور.. لكن ولادك في كل مكان عايشين بحسك. الزرعة بتكبر يا دكتور.. ومش ناسيين جميلك معاهم…

ولن ينسوه…

أبدًا…