The Definitive Guide to Living in the Capital , Cairo , Egypt

سعيد محمود

“روايات مصرية للجيب“.. اسم اتعلق بيه كتير من جيل التمانينيات والتسعينيات في القاهرة وباقي المحافظات، وكمان العالم العربي كله، خصوصًا عشاق سلاسل “رجل المستحيل” و”ملف المستقبل” و”كوكتيل 2000″ للدكتور نبيل فاروق، و”ما وراء الطبيعة” للدكتور أحمد خالد توفيق، وطبعًا «فلاش» للفنان خالد الصفتي.

أكتر من فتاة كان فارس أحلامها المقدم أدهم صبري، وأكتر من شاب تخيل نفسه رجل المستحيل وهو بيواجه عصابات المافيا ورجال المخابرات حول العالم، ده غير اللي تخيلوا نفسهم من فريق الرائد نور الدين محمود وهم بيسافروا عبر الزمن وبيواجهوا مخاطر كبيرة لإنقاذ الأرض، وبعد كده يقعدوا حوالين الدفاية يسمعوا حكايات العجوز العصبي النحيل الدكتور رفعت إسماعيل عن مغامراته مع المسوخ والشياطين، وحبيبته ماجي “التي تمشي على العشب فلا تثني منه عودًا”.

ده طبعًا غير مغامرات “ميدو” وكلبه مرهف الحس “هرقل”، و”سوزي” وقطتها الشرسة “هادية”، والمواطن المطحون “منسي أفندي”، و”العالم مفهوم” و”علام الفشار”، وغيرهم من أبطال سلاسل روايات مصرية للجيب.

كان بيميز الروايات دي حجمها الصغير ورسوماتها المميزة اللي أبدعتها ريشة الفنان الراحل إسماعيل دياب، لكن بعد فترة قررت الشركة العربية الحديثة ناشرة الروايات طبعها في قطع كبير وتدريجيًا اختفت طبعات الجيب من الشركة، وده اللي سبب ضيق كبير لمحبي النوع ده من السلاسل.

ومع بدء معرض القاهرة الدولي للكتاب 2023 قررت الشركة العربية الحديثة عودة طبعات الجيب من جديد، عشان يكون عشاق رواياتها على موعد مع الحجم المحبب لقلوبهم وبأسعار مخفضة زي ما اتعودوا من دار النشر على مدار سنوات.

تقدروا تزوروا جناح روايات مصرية للجيب في معرض الكتاب في صالة 5 جناح C24 عشان تستمتعوا بالعروض المميزة.