The Definitive Guide to Living in the Capital , Cairo , Egypt

فن وثقافة

ممكن تشوف بإيديك؟.. مسار للمكفوفين في المتحف المصري في التحرير

التحرير المتحف المصري المكفوفين وزارة الآثار
ممكن تشوف بإيديك؟.. مسار للمكفوفين في المتحف المصري في التحرير
بواسطة
Omar Abd-elmaqsoud

خطوة مصرية مهمة جدًا وتستحق الكلام عنها والإشادة بيها، لإنها خطوة إنسانية جدًا، وساعدت شريحة كبيرة أوي من المكفوفين، سواء المصريين منهم أو الأجانب اللي جايين يزوروا مصر، والخطوة دي هي عمل مسار مخصص للمكفوفين (الكبار والأطفال) في المتحف المصري في التحرير.

 

 

في شهر يونيو 2019 افتتح وزير الآثار الدكتور “خالد العناني” المسار المخصص للمكفوفين في المتحف، واللي بيضم 12 قطعة أثرية مختلفة، واللي كان في الأصل  مبادرة في إطار التعاون بين المتحف المصري والمعهد الإيطالي للآثار في القاهرة، ومتحف ولاية “أوميرو” الإيطالية، وكان ده كله في إطار برنامج “الحياة الإيطالية” التابع لوزارة الخارجية الإيطالية، واللي كانت بتنظمه لدعم التراث الثقافي العالمي.

 

 

الهدف من المسار ده هو تعريف المكفوفين بتراث وثقافة وتاريخ مصر، وتعريفهم كمان بجميع المقتنيات الأثرية الموجودة في المتاحف المصرية، وده من خلال لوحات تعريفية مكتوبة بطريقة “برايل” قدام كل أثر أو تمثال موجود في المسار، علشان ينمي الوعي الأثري والثقافي عندهم، ويديهم إحساس إن مافيش حاجة ناقصاهم.

الجميل في الموضوع إن حتى المرشد السياحي المرافق لوفد الزوار المكفوفين بيكون كفيف زيهم، وبيتعامل مع كل الفئات العمرية من الزوار المكفوفين في المتحف، بدءًا من سن 6 سنوات، والأهم إنه بيتم تدريب المرشدين دول على كيفية التعامل واتباع القواعد النفسية والقدرات الذهنية المتفاوتة للزوار المكفوفين أثناء إرشادهم في الجولات.

 

 

أمناء متاحف مختلفة في القاهرة كمان تم تدريبهم على كيفية التعامل مع الزائر الكفيف، ومنها على سبيل المثال المتحف المصري الكبير والمتحف القبطي ومتحف الحضارة والمتحف الإسلامي ومتحف المركبات الملكية.

 

 

الطفل الكفيف كمان كان ليه جزء كبير من الاهتمام في المبادرة، فهنلاقي في متحف الطفل الموجود في المتحف المصري في التحرير مستنسخات لقطع ولوحات أثرية مصنوعة من مكعبات “ليجو – LEGO” وبتعتبر زيارة القطع دي من أهم محطات جولة الأطفال المكفوفين في المتحف المصري، وفي المكان ده يقدروا يلمسوا النسخ المختلفة من تماثيل الفراعنة وأبو الهول المصنوعة من آلاف السنين بس كمكعبات صغيرة.

مقترح