The Definitive Guide to Living in the Capital , Cairo , Egypt

فن وثقافة

5 معلومات عن شطرنج الملك فاروق بمتحف المجوهرات (صور)

شطرنج الملك فاروق متاحف الإسكندرية متاحف مصر متحف المجوهرات الملكية مقتنيات الملك فاروق
5 معلومات عن شطرنج الملك فاروق بمتحف المجوهرات (صور)
بواسطة
Mohamed Talaat

كتير مننا بيحبوا الشطرنج وبيعتبروها لعبتهم المفضلة، سواء على المقهى أو في الرحلات أو حتى في البيت. لكن هل تخيلت نفسك بتلعب شطرنج بقطع من الأحجار الكريمة سعرها لا يقدر بثمن؟ لو هتسافر الإسكندرية في القترة الجاية ننصحك بزيارة متحف المجوهرات الملكية، وهناك هتشوف شطرنج الملك فاروق، اللي بيعتبر من أهم كنوز المتحف.. تعالوا نتعرف أكتر على القطعة الفنية دي ونعرف حكايتها.

1 – شطرنج الملك فاروق هو قطعة نادرة من مقتنيات الملك فاروق، وهي الوحيدة من نوعها في العالم، وبحسب خبراء فالقطعة دي لا تقدر بثمن، وهي مصنوعة من الذهب والماس.

2 – بحسب إدارة المتحف، فالشطرنج ده كان هدية من شاه إيران محمد رضا بهلوي للملك فاروق آخر ملوك مصر، والهدية دي كانت قطعة فنية فريدة ومميزة في عالم المجوهرات وعالم الشطرنج كمان، وده لأنها مالهاش مثيل في كل متاحف العالم.

3 – الشطرنج مصنوع من الذهب ومرصع بالماس ومحلى بالمينا الملونة ومكون من 32 قطعة بتشمل: (قطعتين للملك، قطعتين للوزير، 4 جمال، 4 أحصنة، 4 أفيال، و16 عسكري على كتفهم الأيمن بندقية ولابسين عمامة بيتوسطها حجر من الماس).

4 – بتنقسم قاعدة الشطرنج لقسمين؛ جزء قاعدته باللون الاحمر وعليها من الأسفل صور 8 من ملوك الهند، و8 صور تانيين لمجموعة من الملكات.

5 – أما الجزء الثاني من القاعدة فبيتميز باللون الزيتي والقاعدة عليها من تحت مجموعة مميزة لأهم المزارات والأماكن بالهند، زي تاج محل والقلعة الحمراء والمسجد الجامع وغيرهم من الأماكن.

معلومات عن المتحف

بيعتبر متحف المجوهرات الملكية أهم مكان في مصر مختص بعرض مجوهرات الأسر المالكة اللي حكمت مصر، واتبنى القصر سنة 1919 في منطقة زيزينيا، وكان خاص بالأميرة فاطمة الزهراء وهي واحدة من أميرات الأسرة المالكة، وتصميم المبنى على طراز المباني الأوروبية في القرن التاسع عشر ومن الداخل مزخرف بوحدات فنية مميزة.

مقترح