The Definitive Guide to Living in the Capital , Cairo , Egypt

فن وثقافة

من “شريهان” إلى “ويجز”.. أبرز النجوم المؤثرين على السوشيال ميديا في مصر خلال 2021

الأكثر تأثيرا في 2021 الشخصيات الأكثر تأثيرا في مصر فنانات مصر قائمة النجوم المؤثرين نجوم مصر
من “شريهان” إلى “ويجز”.. أبرز النجوم المؤثرين على السوشيال ميديا في مصر خلال 2021
بواسطة
Cairo 360

نقلًا عن كلام القاهرة

سنة خلصت وسنة جديدة حلوة جاية، نجوم اختفت ونجوم تانية نورت، معاهم فرحنا واتبسطنا وضحكنا ويمكن كمان زعلنا! إحنا كده المصريين طول عمرنا والفن والفنانين عيلتنا الكبيرة، وكمان فخرنا قدام العالم كله.
ببساطة كده 2021 ماكنتش سنة عادية خالص على الفن وناسه، وتستحق مننا نرجع بشريط الذكريات ونقف قدام كام لقطة كده، أثرت فينا هنفضل فاكرينها، من تكريم، لجوايز عالمية، لتريند استمر أيام بلياليها، لأزمات صحية، عاشها نجوم غاليين علينا.

قائمة “كلام القاهرة” لـ أبرز النجوم المؤثرين على السوشيال ميديا في مصر خلال 2021

شيريهان

رمضان بتاع زمان عيشناه السنة دي، لما خطفت قلوبنا بتفاصيلها ورقصها وشعرها، شيريهان قادرة ترجعنا بالزمن في ثانية في كل مرة عنينا بتشوفها. “فرحتينا ونتمنى نشوفك مع كل رمضان زي زمان”.

منة شلبي
أشطر واحدة في جيلها، اترشحت في 2021 لـ جائزة “إيمي” الأمريكية، عن دورها في مسلسل “في كل أسبوع يوم جمعة”. وكانت أول ممثلة مصرية وعربية توصل للترشيح ده. تفتكروا السنة خلصت على كده؟ لأ طبعًا، منة كان ليها أكثر من فيلم سينمائي مميز السنة دي، غير مشاركتها في مهرجان “الجونة” كعضو لجنة تحكيم. “برافو يا منة”.

أمير المصري

لسه مكملين معاكوا تألق فنانينا في بلاد بره، وكان أبرزهم الفنان أمير المصري، اللي فاز بجائزة “بافتا- اسكتلندا” البريطانية كأفضل ممثل، عن دوره في فيلم”Limbo”، يمكن أمير لسة نجم صغير لكنه أثبت للكل إنه هيبقي من أهم نجوم مصر قريب. “حاجه في منتهى الفخر والله”.

ياسمين عبد العزيز

أزمة صحية قوية بس هي كانت أقوى وخفت، أكيد 2021 كانت من أصعب السنين اللي عدت عليها، يمكن رصيدها مش بس في إيرادات شباك التذاكر، ده حب في قلوب الملايين، حلقة ياسمين وزوجها أحمد العوضي مع منى الشاذلي، مصر كلها استنتها واتفرجت عليها تقريبًا. “قد إيه مبهجة وملهمة يا ياسمين”.

أحمد حاتم
مش بس فنان محبوب وجمهوره كبير، السنة دي حقق أحمد حاتم نجاح جديد بس في عالم الرياضة، وحطم مع فريق منتخب مصر للسباحة الرقم القياسي لموسوعة جينيس في سباق التتابع 100x 50م. “عاش يا بطل”.

دنيا سمير غانم
صدمة قوية عاشتها دنيا في 2021، بعد فراق والدها ووالدتها الفنان سمير غانم والفنانة دلال عد العزيز، صدمة كفيلة توقع أي إنسان وماتقوملهوش قومة تاني، وكتير قولنا هتبعد عن الفن خلاص ومش راجعة، بس الجميلة دنيا فاجأتنا بمشاركتها في حفلة من حفلات “ذوي الهمم” بأغنيتها العظيمة لمصر، كانت حقيقي “ملاك وسط ملايكة” زي ما وصفها زوجها الإعلامي رامي رضوان. “وحشتينا وقلبنا معاكي”.

شاكوش وكمال وبيكا

سواء اتفقنا أو اختلفنا معاهم، مانقدرش ننكر تأثير حسن شاكوش، وعمر كمال، وحمو بيكا، في 2021 وتأثير 2021 عليهم، وعلى قد ما أغانيهم كسرت الدنيا، على قد ما مشاكلهم مع النقابة كانت كبيرة، والكلام عليهم كان كتير. “ماننكرش إن ليهم جمهور”.

شيرين عبد الوهاب

كان متوقع إن شيرين تنفصل عن زوجها حسام حبيب، لكن اللي فعًلا ساب بصمة فينا هو شكل شيرين بعد الانفصال، وزي ما بيقولوا الفنان ملك للجمهور، شعر شيرين زعل عليه جمهورها زيها بالظبط، شيرين ظهرت قوية لكن جواها حزن كبير ماقدرتش تخبيه في نبرة صوتها ولمعة عينيها، والأهم إنها رجعت تغني تاني. “بنحبك يا شيرين”.

ويجز

سنة2021 كانت وشها حلو على- “وجوزة الحكيم”- ده اسمه بينه وبين جمهوره، في حتة تانية لوحده ياجماعة، طلع سلم النجاح والشهرة وحلف ما هو نازل، يعني حقق التارجت السنة دي وبزيادة كمان، وده مش كلام وخلاص، أبسلوتلي. حفلاته تشهد، والحقيقة إن أغانيه لذيذة ومختلفة. “على وضعك يا ويجز”.

كل سنة ونجومنا مؤثرين في العالم كله!

مقترح