The Definitive Guide to Living in the Capital , Cairo , Egypt

الصور من الصفحة الرسمية للمعرض على فيسبوك

من ساعات قليلة، وبالتحديد يوم الثلاثاء 4 فبراير انتهى معرض القاهرة الدولي للكتاب 2020، في دورته الـ 51، واللي تم تنظيمه في مركز مصر للمعارض والمؤتمرات الدولية في التجمع الخامس، وتم اختيار دولة السنغال كضيف شرف، والكاتب الراحل جمال حمدان كشخصية المعرض.

إدارة المعرض أعلنت رسميًا إن عدد الزوار السنة دي اقترب من 4 مليون زائر، ويوم الجمعة 31 يناير شهد أعلى رقم زيارة للمعرض وصل لـ 580 ألف زائر.

المعرض له أهمية كبيرة، وهو حدث عالمي بينتظره الملايين، وده اللي وضحه محمد عبد الرحمن، رئيس تحرير الإعلام الرقمي للدورة الحالية للمعرض، واللي أكد لموقع كايرو 360، أن نسبة المبيعات السنة دي كانت عالية جدًا، في تاني سنة اتنقل فيها المعرض من مقره السابق في أرض المعارض بمدينة نصر، إلى مركز مصر للمعارض والمؤتمرات الدولية في التجمع الخامس.

وأضاف عبد الرحمن أن السنة دي وزارة الثقافة نجحت بدرجة كبيرة في إدارة الدورة بشكل محترف، وأكد أن كان فيه مميزات كتير عن السنة اللي فاتت، وكان أهمها حل مشكلة المواصلات بشكل كبير، ووصف عبد الرحمن معرض القاهرة الدولي للكتاب السنة دي بأنه كان كرنفال احتفالي مبهر، وناس كتير راحت أكتر من مرة، وده نتيجة توافر الخدمات واللي كان منها كشك الموسيقى وقاعة المسرح والسينما والأكل وقاعة الطفل.

رئيس تحرير الإعلام الرقمي أكد كمان أن القصة مابقتش أروح أشتري كتابين من المعرض وأمشي، لكن الموضوع بقى أكبر بكتير، وأنهم حققوا زيادة في الإعلام الرقمي حوالي 30% في عدد المتابعين لصفحة المعرض على الفيسبوك، بالإضافة للزيادات في عدد المتابعين لحساب المعرض على تويتر وإنستجرام.

وحضر مشاهير كتير الدورة 51 من المعرض، منهم النجم المصري محمود تريزيجيه لاعب نادي إيستون فيلا الإنجليزي، ومن الشخصيات الفنية حضرت يسرا ومصطفى شعبان ومحمد فراج ولبلبة ومحمود حميدة وشخصيات عامة تانية كتير.

أما عن حركة البيع السنة دي والكتب الأكثر مبيعًا، أكد عبد الرحمن أنه مافيش أرقام رسمية، وأن كل دار بتعلن عن أرقام مبيعاتها بشكل منفصل، لكنه بيطالب أنه يكون فيه جهاز للإحصاء يخرج أرقام رسمية، وبصفة عامة مافيش دار كانت موجودة في المعرض ماحققتش مبيعات مميزة.

وأشاد رئيس تحرير الإعلام الرقمي، بالعروض السينمائية والمسرحية والفنون الشعبية اللي كانت كلها مجانية، وكمان قاعة الطفل اللي كان دايمًا فيها أطفال بيلعبوا وبيتعلموا وبيعملوا أنشطة مختلفة على مدار اليوم، وكمان وجه الشكر لفريق المتطوعين اللي كان لهم دور كبير في المعرض لتوجيه الجمهور للصالات ودور النشر.

فريق كايرو 360 بيشكر كل فريق المعرض السنة دي.