The Definitive Guide to Living in the Capital , Cairo , Egypt

مش أول مرة نسمع عن مشاركة فنانين من جنسيات مختلفة عمومًا، وعربية خصوصًا في أفلام بوليوود، ويمكن آخرهم كانت “نورا فتحي” الممثلة المغربية، لكن مؤخرًا وخلال موسم عيد الأضحى اللي فات، انضم الفنان المصري “مو إسماعيل” لفريق الفنانين العرب اللي بيشاركوا في أفلام هندية عالمية، وبكده يكون أول فنان مصري يشارك في أفلام من إنتاج بوليوود.

 

مشاركة “مو” كانت من خلال الجزء الثاني فيلم الأكشن والرومانسية والدراما Khuda Haafiz Chapter II: Agni Pariksha واللي اتعرض يوم 8 يوليو اللي فات في سينمات الهند، وحقق نجاح كبير، وإشادة نقدية كبيرة، وحصل علي 8.8 من 10 علي موقع تصنيف الأفلام العالمي IMDb، وخلينا نقولك إن إيراداته وصلت لحد دلوقتي ما يقرب من 20 مليون روبية في دور العرض الهندية.

بيشارك في بطولة الفيلم النجم الهندي “فيديوت جموال” و”شيفاليكا أوبيروي” و”دانيش حسين” و”مينكا راي” و”أسرار خان” وهو من إخراج “فاروق كبير”.

مو إسماعيل أكد على أنه سعيد بالمشاركة في التجربة دي، خاصةً في ظل حرصه على متابعة التطور الحاصل في السينما الهندية، ومشاركتها الواضحة في إثراء السينما العالمية بشكل عام، خلال الفترة الماضية، وأن اختيار المخرج “فاروق كبير” له كان بمثابة حلم بقى حقيقة، وده لأنه شغوف بالفن وخاصةً مجال صناعة الأفلام على مستوى العالم.

 

 

الجميل في الموضوع، إن في مشاهد من الفيلم تم تصويرها في عدد من المناطق السياحية والشوارع في مصر، وده حصل خلال 40 يوم، تم فيها تصوير بعض المطاردات في منطقة الأهرامات، والقلعة، وشوارع مصر القديمة زي شارع المعز والحسين.

بحسب كلام “مو” فالجزء ده من الفيلم أقوى من الجزء الأول اللي عرض على أحد منصات الأفلام العالمية سنة 2020 بسبب فيروس كورونا، وعلشان كده ما اتعرضش في السينمات وقتها.

أحداث الفيلم بتدور حوالين “سمير” و”نرجس” اللي بيواجهوا مصاعب في حياتهم، لكن شعاع من الأمل والتفاؤل هينور لهم طريقهم لما تدخل “نانديني” الصغيرة حياتهم، ويكونوا أسرة سعيدة، لكن للأسف سعادتهم مش هتطول لإنه هيحصل تطور غريب في الأحداث هتختفي فيه “نانديني” وهيبدأ “سمير” يدور عليها، ويسافر من مكان للتاني في محاولة لاستعادتها، في أجواء من الإثارة والأكشن.

 

 

قدم “مو إسماعيل” في الفيلم الدور الرئيسي لشخصية الشرير في مصر”طابش حاجي” وهو عضو في المافيا، وهتحصل ما بينه وما بين “فيديوت جموال” اللي بيقوم بدور “سمير” خاصةً وأن “طابش” هو اللي بيحمي الشخص اللي خطف “نانديني” بنت “سمير”.

فيلم Khuda Hafez مش أول عمل يشارك فيه مو إسماعيل، لإن بداية حياته كممثل كانت من 12 سنة تقريبًا، يعني في 2010، وقطع خلال المدة دي شوط طويل في العمل مع نجوم كبار في كثير من الأفلام من مختلف أنحاء العالم، منها War Machine، وThe Diversion، ده غير إنه كان كمان ضمن فريق الإنتاج لعدد من الأفلام زي Star Trek Beyond وMission: Impossible – Ghost Protocol.