The Definitive Guide to Living in the Capital , Cairo , Egypt

فن وثقافة

هتشارك فيه فرق دولية.. تفاصيل مهرجان حكاوي الدولي لفنون الطفل

أطفال حكاوي طفل عرائس عروض فنية في القاهرة مسرح مهرجان مهرجان حكاوي الدولي لفنون الطفل مهرجانات في مصر
هتشارك فيه فرق دولية.. تفاصيل مهرجان حكاوي الدولي لفنون الطفل
بواسطة
Mohamed Talaat

بعد ساعات، وبالتحديد يوم الجمعة 6 مارس 2020، هتنطلق في مصر فعاليات مهرجان حكاوي الدولي لفنون الطفل، واللي هتكون في محافظات القاهرة والإسكندرية والمنيا، وهيستمر المهرجان لحد يوم 12 مارس 2020.

“حكاوي الطفل” هيكون فيه عروض مختلفة ومميزة من مصر ومن دول تانية مختلفة، وعدد العروض اللي هيتم تقديمها في المهرجان 22 عرض، ده غير الندوات والورش والفنانين المستقلين اللي هيشاركوا في المهرجان بعروض خاصة.

وإلى جانب مصر، هيشارك في المهرجان فرق من هولندا وأمريكا وإنجلترا وفرنسا وألمانيا وكندا، وفرق هولندا هتقدم 4 عروض منها مسرحية “فيرويل”، وهي عرض خيالي بيناقش الرغبات والتخلي عنها، وكمان عرض “هيرمت”، وهو آداء طفولي عن منزل صغير، وهيكون كمان فيه عرضين رقص هولندي معاصر لفرقة أرك 8، والعرضين هيتناولوا التغير المناخي في عالمنا.

أما مصر فهتشارك بـ 7 عروض، منهم عرض “الأراجوز” اللي هيكون بعنوان “ماتبصيش يا  لولو”، وعرض “دي.. الحكاية”، واللي هيكون فيه مجموعة قصص خيالية وحكايات مصرية شعبية، ده غير عرض مسرحي بعنوان “ظل في مدينة الورق”، وعرض “نوسا”، وهو حكاية عن الصداقة والتواصل مع الطبيعة، وعرض “التليفون الخربان”، وعرض العرائس “حلوي البرتقال”، وأخيرًا العرض التجريبي “الطائر”، كمان هيتم عرض فيلم 2040.

عروض مهرجان حكاوي هتكون في مركز التحرير الثقافي، ومسرح الهناجر للفنون بدار الأوبرا المصرية، وبعض شوارع القاهرة التاريخية، ومكتبة الإسكندرية، وجيزويت المنيا، ومسرح الفلكي، وقاعة إيوارت بالجامعة الأمريكية، ودرب 1718، ومستشفى 57357.

وعلشان تتعرفوا أكتر عن المهرجان، وتعرفوا كل الأنشطة، بننصحكم بزيارة صفحته الرسمية على فيسبوك من هنا.

مقترح