The Definitive Guide to Living in the Capital , Cairo , Egypt

الخدع البصرية فن موجود من قديم الزمان، وكتير من الناس بيستخدموه بمهارة كبيرة، ومنهم شخصية الساحر اللي بتبهرنا لما نزور أي سيرك في مصر أو في العالم، ورغم إننا بنبقى عارفين إن الأمر فيه خدعة، لكننا بنكون مبسوطين.. لكن هل فكرتك قبل كدة تعيشوا بنفسكم بعض الوقت في مكان بيعتمد بشكل كامل على الخدع البصرية؟ وبيخليكم تتعاملوا معاها باعتبارها حقيقة؟ ده اللي بيوفروا ليكم “متحف الأوهام” في القاهرة، واللي هيخليكم تعيشوا الخيال والوهم من خلال 70 لعبة وخدعة بصرية مناسبة للأطفال والكبار.

فريق كايرو 360 هيعرفكم أكتر على المكان المبهر ده، يلا نبدأ: 

“متحف الأوهام” بيعتمد على خداع حواسكم، وبيدخلكم لعالم مختلف من الألعاب اللي بتعتمد على الوهم، واللي هتسحوا إنها حقيقة لإن المكان بينفذها بإتقان شديد، وهو مناسب لكل الأعمار، وهناك هتستمتعوا بتجربة بصرية وحسية وتعليمية شيقة جدًا وجديدة، وممكن تمشوا داخل البيسين من غير ما تتبلوا، أو حتى تمشوا في نفق الأرض فيه بتهتز بقوة، أو تقفوا على راسكم في غرفة دوارة.

 

وعلى عكس فقرات الساحر في السيرك، هتلاقوا في كل ركن من “متحف الأوهام” شرح علمي ورياضي ونفسي لكل خدعة بتمروا بيها، وهتعرفوا ليه حسيتوا فيه الاحساس اللي بيعتمد على الخداع، علشان تتعلموا إزاي الخدع البصرية ممكن تخدع إدراكم وعقلكم، لأن الهدف الرئيسي من المتحف أننا نكتشف سبب إدراك العين لأشياء مش مفهومة للعقل.

يعني باختصار لما تزوروا المتحف مش هتشوفوا أي حاجة حقيقية، ولكن في النهاية هتفهموا سبب اللي شفتوه، يعني هو مش مجرد مكان ترفيهي ولكن هما بيعتبروا نفسهم مؤسسة تعليمية بتعتمد على الحقائق.

المتحف مفتوح يوميًا من 10 صباحًا إلى 10 مساءً، وأسعار التذاكر للأطفال 175 جنيه، والكبار فوق 12 سنة 200 جنيه، والأسرة كاملة شخصين وطفلين 650 جنيه، والأطفال أقل من 5 سنين ببلاش، والجولة داخل متحف الأوهام بتكون مدتها 30 دقيقة.

العنوان: طريق القاهرة الإسكندرية الصحراوي الكيلو 38 – الشيخ زايد.

وعلشان تعرفوا أكتر عن متحف الأوهام زوروا صفحتهم على الفيسبوك من هنا.