The Definitive Guide to Living in the Capital , Cairo , Egypt

هند صبري مش مجرد فنانة أو نجمة اسمها على أفيشات الأفلام والمسلسلات، كتير من الناس أصبحوا بيتعاملوا معاها على إنها صديقة، أخت، أو زميلة دراسة، كايرو 360 قابلت هند صبري واتكلمنا معاها عن مسلسلها الجديد، وعن القاهرة وعلاقتها بيها، وعن السينما ومشاريعها الجاية.

 

بعشق القاهرة

في البداية أكدت هند إنها بتعشق القاهرة وعلاقتها بيها علاقة غريبة، يعني هي بتحب نيل القاهرة وكتير جدًا بتركب نايل تاكسي، لكن بتكره في القاهرة الزحمة والدوشة.

“القاهرة مدينة مهمة بالنسبة لي، وخصوصًا المعادي لإني كنت ساكنة فيها، وبحب الأكل بتاع جنوب شرق آسيا، ومطعمي المفضل هو مطعم تايلاندي في المعادي”.

هند قالت إنها بتخطف أي وقت أجازة وتروح المطعم ده، رغم إنها مشغولة في مسلسلها الجديد “حلاوة الدنيا” اللي هيتعرض في رمضان 2017.

وأكدت لنا إن مسلسلها الجديد الهدف منه إزاي الناس تحب الحياة وتاخدها كده زي ما هي، وبتلعب فيه شخصية أمينة اللي بتعاني من مرض السرطان وإزاي بتحب الدنيا وحلاوتها .

المسلسل بيشارك في بطولته ظافر العابدين ومصطفى فهمي وأنوشكا وحنان مطاوع، وبتكتبه ورشة بيشرف عليها تامر حبيب وهو فورمات متاخد من مسلسل أسباني ومن إخراج حسين المنباوي، وبينتجه بي لينك وإيجل فيلمز وطبعًا هنشوفه في رمضان.

المسلسل ده هند بتقول عنه إنه علامة من السماء لأن وقت ما اتعرض عليها كانت لها صديقة مقربة جدًا ماتت بالسرطان، وعلشان كده هي وافقت عليه وخصوصًا إن السرطان بقي مرض تقريبًا مافيش عيلة ما احتكتش بيه أو تعاملت معاه.

بتكمل هند كلامها لـ كايرو 360 أنها مش بتنسى أبدًا لما كانت في الأردن في مناسبة خاصة بالتوعية بالمرض، وكان فيه شخصية أردنية مهمة طلبت من كل حد احتك عن قرب بمريض سرطان إنه يقوم يقف، فالقاعة كلها وقفت وده دليل على انتشار المرض.

هند فرحانة إنها بتشتغل تاني مع ابن بلدها ظافر العابدين اللي كانت هي أول واحدة تتحمس له في مصر من خلال مسلسلها “فيرتيجو” وهي شايفاه متمكن جدًا وبيعرف يمثل كويس وفي الوقت نفسه شكله حلو “جان” زي ما بيقولوا.

الكنز

هند كمان بتصور فيلم “الكنز” اللي معمول على جزئين وبيشاركها بطولته محمد رمضان ومحمد سعد وبيخرجه شريف عرفة وبيكتبه عبد الرحيم كمال.

هتفرج على واحة الغروب

هند أكدت لنا إنها مهتمة تتفرج على مسلسل “واحة الغروب” لهند صبري وعاجبها البرومو بتاعه جدًا وأكيد هيكون فيه مجهود لكاملة أبو ذكري ونانسي عبد الفتاح وكل الأبطال، وهتتفرج على “عفاريت عدلي علام” للزعيم عادل إمام، واللي بيخرجه رامي إمام وكمان في “اللا لاند” لدنيا سمير غانم، و”لا تطفئ الشمس”، ده غير مسلسلات يسرا ونيللي كريم، وهذا المساء وريح المدام وخلصانة بشياكة، ومسلسل أحمد السقا ومسلسل كريم عبد العزيز.

بتقول هند “الحقيقة إني ناوية أتفرج على أغلب الأعمال الرمضانية علشان أشوف إحنا وصلنا لفين، ولإني بحب جدًا أتابع شغل كل الزملاء”.