هيغيروا مودك.. 5 أنشطة ممكن تعملهم في الويك إند
أنشطة في القاهرة خروجات في القاهرة خروجات في الويك إند دليلك للويك إند
Cairo 360
الصورة الرئيسية لبلاك تيما، تصوير: أحمد ناصر
جه وقت الفرفشة والروقان، بعد أسبوع شغل وتاسكات، وعشان ننبسط بأحلى يومين في الأسبوع، ضروري نكون عاملين خطة علشان نستغلهم كويس، قبل ما يعدوا علينا هوا. أما بقى لو لسه مش عارف هتعمل إيه في الويك إند، إحنا هنقترح عليك شوية حاجات لطيفة واختار منها اللي يناسبك، سواء كنت هتقضيه في البيت أو ناوي تخرج.
روح متحف أم كلثوم
بمناسبة الذكرى الـ 47 على وفاة كوكب الشرق أم كلثوم، واللي رحلت عن عالمنا في 3 فبراير عام 1975، دخول متحف أم كلثوم بالمنيل هيكون مجانًا للجمهور لمدة أسبوع. أكيد هتستمتعوا هناك.
هتنبسط في معرض الكتاب
جمع صحابك أو عيلتك، وزوروا معرض القاهرة الدولي للكتاب في مركز مصر للمعارض الدولية، مواعيد المعرض يوم الجمعة بتكون من الساعة 1:00 الظهر لـ 9:00 بالليل. والسبت من الساعة 10:00 الصبح لـ 8 بالليل.
أفلام جديدة في السينما
أفلام كتير نزلت السينما في الفترة الأخيرة، بنرشحلك تتفرج على الأفلام دي: “حامل اللقب” لـ دينا الشربيني وهشام ماجد، أو “الجريمة” لـ أحمد عز ومنة شلبي، أو “من أجل زيكو” لـ كريم محمود عبد العزيز ومنة شلبي.
بلاك تيما في الساقية
عندك شوية طاقة وعايز ترقص وتهيص؟ روح ساقية الصاوي يوم السبت الجاي، واحضر حفلة “بلاك تيما”، هتلاقي المواعيد وتفاصيل الحجز هنا.
اتفرج على مسلسلات “البحث عن علا ” و”منورة بأهلها”
حضر الفشار وافتح نتفليكس وشوف مغامرة جديدة بتعيشها الفنانة هند صبري أو دكتورة علا عبد الصبور بعد الطلاق، هتكشفها أحداث مسلسل “البحث عن علا “. المسلسل هيتعرض بداية من النهاردة الساعة 10:00 الصبح. ممكن كمان تشوف أول حلقة من مسلسل “منورة بأهلها” السبت الجاي على منصة “شاهد” الساعة 12:00 الظهر.
ويك إند سعيد!
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
