The Definitive Guide to Living in the Capital , Cairo , Egypt

المتعارف عليه أن القاهرة فيها “المتحف المصري” لأنه الأشهر في العاصمة، لكن الحقيقة إن القاهرة مليانة متاحف تانية مميزة، بتعاني من قلة الزوار، اختارنا لكم منهم 5 متاحف مميزين جدًا، هنتكلم عنهم في السطور الجاية، بننصحكم تزوروهم في أقرب فرصة.. وأكيد مش هتندموا.

متحف الشمع

مكانه في مدينة حلوان، وشغال يوميًا من 10 حتى 2 مساءًا ماعدا الجمعة، وتقدر توصل له من خلال المترو، وهتشوف فيه مجموعة من التماثيل المصنعة بإيد الفنان المصري جورج عبد الملك، ومن خلالها وثق مراحل تاريخية مهمة من تاريخ مصر، وفيه كمان لوحات مميزة فرعونية، وتجسيد لعلاج ريتشارد قلب الأسد، وأجواء رمضان ولوحات للفن الشعبي، وإجمالي محتوياته 116 تمثال شمع و26 لوحة.

العنوان: عين حلوان – بجوار محطة المترو

رقم التليفون: 025563573

متحف أحمد بك شوقي

المتحف بيختص بمقتنيات أمير الشعراء النادرة اللي كان له مكانة بين محبيه لا تقل عن مكانة الأهرامات في مصر، ومواعيده من 10 صباحًا حتى 3 عصرًا ماعدا الجمعة والسبت، وفيه موجود مكتبته العريقة اللي فيها 332 كتاب، ورسائل ومسودات بخط إيده، وتحف وأنتيكات، ومخطوطات لأعماله الشعرية، ومجموعة لوحات زيتية، وصور نادرة، والأوسمة والجوائز اللي حصل عليها، وغرفة نومه الأصلية.

العنوان: 6 شارع أحمد شوقي، من شارع مراد، كورنيش النيل، أمام حديقة الحيوان بالجيزة .

رقم التليفون: 0233570790

متحف محمد عبد الوهاب

متحف الموسيقار محمد عبد الوهاب اللي هو من أهم الشخصيات الموسيقية في العالم العربي، وللأسف المتحف بتاعه مهجور، وتقريبًا محدش يعرفه أو بيزوره، ومواعيده من 9 صباحًا حتى 3 عصرًا ماعدا الجمعة والسبت، وهتلاقوا جوا المتحف، مكتبة غنية بالكتب النادرة، والمقعد الهزاز بتاع عبد الوهاب، وجهاز جرامافون والبيك آب الخاصين بيه، ومجموعة من ملابسه، وأهم شهادات التقدير والأوسمة والنياشين اللي حصل عليها، والبيانو اللي كان بيعزف عليه، والنوتة الموسيقية لأغانيه، غير صوره النادرة.

العنوان: المعهد العالي للموسيقى العربية – شارع رمسيس – بجوار مترو جمال عبد الناصر.

متحف الجمعية الجغرافية المصرية

المتحف بتاع الجمعية من أقدم المتاحف في مصر، واتأسس سنة 1875 على إيد الخديوي إسماعيل، وبيشتغل من 10 صباحًا حتى 2:30 ظهرًا، ماعدا الخميس والجمعة، وكان هدفه تشجيع استكشاف الأقاليم في مصر وأفريقيا وهتلاقوا جواه خرائط ومنشورات وقطع أثرية من القرن الـ18 لحد القرن الـ20، وهتعرفوا جواه طرق التدخين المختلفة وأشهر الألعاب الشعبية عند المصريين، دا غير الملابس والمجوهرات، وعدة الحلاقين المتجولين، وتماثيل متقنة وخرائط ومجسمات لقناة السويس ومراحل بناءها، ومتنسوش تركزوا مع القاعة المخصصة للكتب القديمة النادرة اللي من القرن الـ16.

العنوان: 109 شارع القصر العيني، بالقرب من ميدان التحرير

رقم التليفون: 0227945450

متحف مصطفى كامل

متحف زعيم الوفد افتتح رسميًا عام 1952، وفي الأساس هو ضريح بيضم رفات الزعيم الراحل مع زميله في الكفاح محمد فريد، وشغال يوميًا من 8 صباحًا حتى 6 مساءًا ماعدا الجمعة والسبت، والمبنى مصمم على الطراز الإسلامي، ومن أبرز معالمه القبة الإسلامية، وفيه هتقدروا تعرفوا قصة كفاحه ضد الإنجليز، وبيحتوي على غرفتين كبيرتين فيهم كتب نادرة عن مصر، ورسائل بخط يد مصطفى كامل وصور لمراحل من حياته، ومجموعة من متعلقاته الشخصية، وكمان لوحات زيتية مميزة بتوثق لحادث دنشواي الشهير، وكمان فيه مجموعة نادرة من الوثائق والصور للحظات تاريخية مهمة.

العنوان: ميدان صلاح الدين – حي القلعة – الأباجية

رقم التليفون: 0225109943