The Definitive Guide to Living in the Capital , Cairo , Egypt

لما نيجي نتكلم عن مطاعم القاهرة، الأكيد والواضح زي الشمس إن عدد المطاعم المميزة يتعد على الصوابع، يعني مثلًا الديكورات المطرقعة والاسم المبتكر مش كافيين لوحدهم، خصوصًا لو كان المطعم ده متصنف في فئة المطاعم الكتيييير اللي بتقدم “مطابخ عالمية”.

مطعم كارما موجود من فترة على الساحة، وأول فروعهم فتح في مكان مميز في سيتي ستارز جنب سينما VIP. يمكن فرعهم الجديد في بوينت 90 مكانه مشكلة شوية، خصوصًا إنه مستخبي في واحد من محلات المول الكتيرة، بس يتميز عن جيرانه بديكوراته المميزة.

دخلنا المطعم وقابلتنا ديكوراتهم المبتكرة من إضاءه الحوائط والأسقف المصممة على شكل مرايات، وبعدها وصلنا لمكاننا قريب من البار والجرسون اللطيف قدم لنا منيوهات ورقها ضعيف شوية.

أول طبق معانا هو سلة عيش بالثوم طري وخفيف، وطعم الثوم كان روعة ومش طاغي على الطعم.

بعد حوالي ربع ساعة نفسنا اتفتحت مع وصول طبق الكنافة بالجمبري (53.95 جنيه) في طاسة مربعة صغيرة، ومعاه طبق صغير سويت شيلي؛ الموضوع ببساطة أربع قطع جمبري ملفوفين في الكنافة بطعمها المقرمش الجميل. الجمبري كان مستوي كويس جدًا، ويا سلام لما تغمسه صوص السويت شيلي وتستمتع بجمال الطعم..

ربع ساعة كمان ووصلت الأطباق الرئيسية وهي Crumbed Chicken (74.95 جنيه) ومعاه Beefy Double (109 جنيه)، وعشر دقايق بعدهم ووصل طبق Chateaubriand (280 جنيه).

بالنسبة لطبق Crumbed chicken فبيكون قطعتين صدور فراخ مقلية وعليهم صوص مارينارا وشوية جبنة موتزاريلا سايحة، ومعاهم باستا بنّا بصوص الألفريدو الأبيض. الفراخ كانت طرية ومستوية كويس وتتبيلتها حلوة، بس القشرة المقلية كانت ضعيفة وبتقع من الفراخ أول لما تبدأ تقطعها.الموتزاريلا وصوص المارينارا كمان كانوا عاملين شغل عالي مع الفراخ.

نطلع على Beefy Double وده قطعة فيليه 250 جرام عليها اختيارك من الصوص –إحنا اخترنا صوص الفلفل الأسود –ومعاه نفس الطبق الجانبي اللي نزل مع الفراخ.

طعم قطعة البيف كان روعة وماشي تمام مع صوص الفلفل القوي بنكهته اللذيذة. أما الباستا فكانت مستوية كويس جدًا في الطبقين وغرقانة في الصوص الأبيض اللي أضاف طعم رائع وقوام غني للباستا.

أخر طبق كان قطعة ستيك Chateaubriand ضخمة توزن حوالي 500 جرام ومعاها بطاطس مهروسة وخضار سوتيه. الفكرة هنا إن المرقة المكتوبة في وصف الطبق في المنيو تأخرت شوية عن الطبق وكانت مليانة فلفل لدرجة إننا رجعناها للمطبخ تاني.

رجعت المرقة بشكل مختلف خالص، وبصراحة كانت من أحلى الحاجات على ترابيزتنا وعملت طعم حكاية مع البطاطس المهروسة اللي كانت جافة لغاية ما رشينا عليها المرقة وغيرت الكلام.

الخضار السوتيه كان خلطة روعة بين الجزر والكوسا والبطاطس وواضح فيهم طعم الزبدة اللذيذة، وبصراحة هو كمان من الأطباق اللي هتفضل في ذاكرتنا لفترة طويلة؛ طبعًا مش سهل طبق خضار يبهرنا بالشكل ده.

نروح لقطعة الستيك الضخمة المستوية عشرة على عشرة وطعمها ولا أحلى.مشكلتها الوحيدة إنها كانت ناشفة جدًا وعايزة المرقة تطريها شوية.

كارما بشكل عام عاملين شغل كويس ومحققين المطلوب منهم كمطعم، بس الفكرة إننا لما زورناهم شوفنا إنهم وقعوا في نفس أخطاء المطاعم المشابهة لهم. هو مافيش شك إن مستواهم كويس زي أي مطعم بيقدم مطابخ عالمية من حيث الأكل الكويس، لكن مافيش أي حاجة مميزة عندهمتخليك تكرر الزيارة في أقرب وقت.