كافيهات
كوستا كوفي – Costa Coffe
كوستا كوفى: مخبوزات ورابس ومشروبات منعشة فى أمريكانا بلازا الشيخ زايد
-
أمريكانا بلازا - خلف سيراميكا كليوباترا - الشيخ زايد
-
مخبوزات وحلويات
-
تم التقييم بواسطة
قيم الآن
Angie El Batrawy
لما تيجي تدخل “أمريكانا بلازا” أكثر حاجة هـ تشدك فى المكان القعدتين اللى فى الهواء الطلق على الجانبين والمتميزة بالمساحات الخضراء الكبيرة والإضاءة الرائعة، واحدة منها خاصة بمطعم “جراند كافيه” اللى كتبنا لكم عنه مقال نقدي قبل كده والثانية خاصة بـ “كوستا كوفي” اللى رحناه قريب قبل ما ندخل سينما أمريكانا بلازا الموجودة فى نفس المكان مع سينما IMAX الجديدة.
إحنا زوار قدامى لكوستا، من أول ما فتح فى مصر وإحنا من المترددين عليه، لكن دى أول تجربة لنا فى الفرع اللى فى أمريكانا بلازا، المكان تحفة بثلاث مناطق للجلوس، واحدة بداخل مبنى الكافيه والمحاطة بزجاج وهناك هـ تكون قريب من ثلاجة الحلويات والكاشير وبار الطلبات، والثانية والثالثة فى المنطقة الخارجية واحدة منهم فى مستوى أعلى من الثانية، وأنت قاعد بـ تبقى شايف كل الناس اللى داخلة المول والإضاءات هـ تعطيك إحساس بالاسترخاء مش طبيعي.
المنيو –زي ما كثير مننا عارف- مليانة أقسام وأصناف كثيرة جدًا هـ تخليك قاعد بـ تقرأها شوية، فيه قسم للسلاطات والساندويتشات اللى بـ تقدم فى أنواع عيش مختلفة زي الرابس والشيباتا والبانيني والباجيت والتوست، وكمان قسم للمخبوزات والمفن والحلوى الخفيفة والكيك، الغريب بقى أن فى الأكلات الجانبية لقينا حاجة اسمها “بطاطس برنجلز” ومكتوب جنبها “اسأل على النكهات المتاحة”، شدتنا وحسينا للحظة أنها نوع جديد لكن اكتشفنا أنها عبوات شيبسي البرنجلز اللى بـ يباع فى السوبر ماركت، استغربنا قوي وصرفنا نظر عنه.
طلبنا من الساندويتشات تشيكن تاندوري (23.50 جنيه) وبـ تكون فى عيش بانيني، وتشيباتا الخضروات (20 جنيه) ودي فى القسم بتاع الأكلات الخفيفة أو “الصيامي”، الطلبات مش بـ تأخذ وقت فى التحضير، بس لما جاءت لنا لقينا أن الساندويتشين فى عيش بانيني، ولما استفسرنا قالوا لنا أن البانيني هو الشيباتا!!
الساندويتشات كانت رائعة والمحتويات فريش، بـ ينزل معاها بطاطس شيبسي ومخلل مشكل، المشكلة بس بالنسبة لنا أن شيباتا الخضار كان فى مكوناتها زيتون مع البطاطس المملحة والمخلل وبالتالى كل الأكل كان كمية الملح فيه كثيرة، وفى رأينا مش راكبة أن كافيه زي كوستا ينزل مخلل مع الأكل! لكن عامة اتبسطنا من الأكل جدًا.
قائمة المشروبات والتحلية كبيرة جدًا وفيها شرح لكل مكونات المشروبات، اختارنا من التحلية بروفيترول شوكولاتة (13 جنيه) ومن المشروبات جربنا الكريمي كولر براونى (21.50 جنيه) وكريمي كولر زيه بالكراميل (24 جنيه)، اللى بالبراونى كان أفضل من الكراميل كان قوامه أفضل وقطع البراونى كانت مضروبة بمثالية مع الحليب والفانيليا، البروفيترول تفوق عليهم، الكرات كانت هشو فيه ومليانة من الداخل كريمة طعمها رائع أبهجتنا مع صوص الشوكولاتة السايح عليها، فى الجون.
بـ ينزل لك زجاجة مياه صغيرة (5 جنيه) لو طلبت، مافيش ضريبة، فريق العمل هناك لطاف جدًا ولقيناهم عاملين إعلان أن فيه مشروبين جداد نزلوا عبارة عن ليمون بالنعناع وليمون بالفراولة وليمون سادة، كان شكل الإعلان جذاب جدًا لكن للأسف ما كانوش متوفرين وقت زيارتنا، مشينا من المكان وإحنا مبسوطين، بـ ننصحك لو حابب تجرب قعدة مختلفة فى جو مختلف تروح على هناك.
أكتب تقييم
مقترح
الحياة في كايرو
موضوع مميز
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
موضوع مميز
