The Definitive Guide to Living in the Capital , Cairo , Egypt

بكل فخر نقدر نقول أن "كوستا كوفى – Costa Coffee" هو المشروب الرسمي عندنا فى المكتب الصبح وقت الفطار، مش بـ نعرف نبدأ يومنا من غيره، ومن كثر ما بـ نطلب منه دليفرى بـ نفكر نعمل "أبونيه" عندهم!

من فترة زورنا فرع أمريكانا بلازا وكتبنا عنه مقال نقدي فى بدايه افتتاحه، وكعادتنا إحنا لازم نروح نعمل إعادة تقييم علشان نشوف هل هـ يضيف المكان ده نقاط فى صفه ولا هـ ينتقص منها من حيث جودة الخدمة والمنتج.

لما رحنا المرة اللى فاتت ما كانش فيه لسه المنطقة المفتوحة اللى بره وممكن تدخل لها من المدخل الرئيسي لأمريكانا بلازا، قعدنا فيها خاصة أنها كلها زجاج شفاف مدخل الشمس اللى بـ نحب نستمتع بها الصبح.

طلبنا من المنيو فى قسم الساندويتشات موتزاريلا بانيني (34 جنيه) وده مكون من جبنة موتزاريلا وطماطم مجففة وخس ومايونيز، وهوت شوكليت (حجم Primo صغير 24.75 جنيه) ومافين بالبلوبيرى (20 جنيه)، الساندويتشات بـ تكون جاهزة وهما بـ يسخنوها بس فى التوستر، وبالتالي الأوردر بتاعنا ما أخذش وقت طويل فى تحضيره، البانيني بـ يبقى مقسوم نصفين ومقدم معاه بطاطس شيبسي ومخلل، العيش كان ناشف شوية من كثير التحميص وكمان كمية الموتزاريلا كانت كثيرة جدًا لدرجة غطت على طعم الطماطم المجففة، والخس ما شوفناش منه غير كام فتفوتة تذكر، تحس أنك بـ تأكل ساندويتش جبنة موتزاريلا فى عيش محمص، بس طعمه فى الإجمال كان لطيف.

الهوت شوكليت كان حلو جدًا والشوكولاتة بتاعته غنية بالطعم ومش ثقيل أوى، والمافين برضه كانت فريش وهشة وخفيفة، من زيارتنا اللى فاتت كان نفسنا نذوق جدًا مشروب الليمون بالفراولة (primo 22 جنيه) اللى مشهورين به، بعد فطارنا بشوية طلبناه وكمان كراميل لاتيه (24.75 جنيه، حجم Primo)، الليمون بالفراولة ده اختراع، السكر اللى فى الفراولة بـ يعمل توازن مع المزازة اللى فى الليمون فبـ يطلع فى الآخر طعم يجنن، استمتعنا به لحد آخر حتة فيه، ولاتيه الكراميل (اللى إحنا مدمنينه فى المكتب) أخذناه معانا تيك أواى بس استغربنا لما جابوه لنا فى عيبوة أصغر شوية من الـ Primo اللى متعودين عليها، بس بجد لاتيه الكراميل فى كوستا من أفضل اللاتيهات اللى هـ تذوقها فى حياتك.

الجرسونات هنا متعاونين ومهذبين جدًا، عذبونا شوية لما طلبنا الشيك فى الآخر، بس المكان روحه حلوة ويفتح نفسك على يوم شغل جديد وطويل، مع قهوة أو لاتيه يضبطوا أي مزاج!