The Definitive Guide to Living in the Capital , Cairo , Egypt

القاهرة مليانة كافيهات ومطاعم، لكن للأسف مش كلها بتوفر لنا قعدة مريحة تخلينا مبسوطين، علشان كده كان لازم نقوم بدور المخبر ونحدد بنفسنا إيه هي أماكن القاهرة المميزة.. تعالوا نعرفها مع بعض من الموضوع ده:

قهوة وردة – Khawet warda

مكان لطيف في المهندسين بيجمع بين الديكورات الشرقية والقعدة الخفيفة اللي تستمتع فيها بعصائر ومشروبات سخنة، وكمان ممكن تطلب ساندوتش في السريع أو فطير وجبنة. العنوان هنا.

بليز – Blaze

قعدة حلوة ومشروبات وأطباق مميزة في مول بوينت 90 في التجمع، علشان تطلب طبق يظبط مودك سواء حلو أو حادق، ومشروب مختلف. العنوان هنا.

دانكن دونتس – Dunkin Donuts

يعني الدلع والقهوة واللاتيه المميز، مكان ينفع تاخد منه اللي طلبته وتقعد في عربيتك أو تقعد جوه مع أصحابك، أحسن حاجة فيه أن الطلب مش بيتأخر خالص مسافة ما بتطلب بتستلم طلبك، تختار نوع الدوناتس بتاعتك أو البراونيز والقهوة وتقعد قعدتك بمزاجك. العنوان هنا.

هاوس أوف كوكو – House Of Cocoa

سواء في فرع الكوربة أو المعادي، المكان ده أثبت أنه مصدر للبهجة والسعادة، كأنك داخل جوه مملكة للشوكولاتة السويسرية اللذيذة، ما نقدرش نرشح طبق معين أو حتى مشروب معين لأن كل حاجة عندهم حلوة. العنوان هنا.

جابيز – Gaby’s

أطباق فخيمة جدًا متقدمة بإتقان شديد وحلويات مغرية بيقدمها جابيز بمنتهى الحرفية. ماجربناش حاجة عنده ماعجبتناش، أكيد هتستمتعوا بقعدكتم هنا. العنوان هنا.

جيلاتو ميو – Gelato Mio

مملكة الآيس كريم والطعم الأصلي في المكان ده، بمجرد ما تختار نوعك المفضل هتاخده في الحال وتستمتع بطعم منعش يحسسك بجو العيد خاصة إن طعم الآيس كريم عندهم حكاية ما بتنتهيش وممكن تاخده وتكمل مشي في الزمالك على النيل وتنسى الدنيا. العنوان هنا.

ماندرين قويدر – Mandarine Koueider

سواء نفسك في غداء أو مجرد حلو أو حتى آيس كريم، ماندرين قويدر وفر لك كل ده في مكان واحد بس، ومش عاوزين نتكلم عن جودة أطباقهم بس الأكيد إنك هتاكل صوابعك ورا الأكل. العنوان هنا.