The Definitive Guide to Living in the Capital , Cairo , Egypt

أي احتفال عندنا في كايرو 360 لا يخلو من وجود كب كيكس… موضوع التورتات بالنسبة لنا بقى قديم، يمكن لأن الكب كيكس عملية أكثر… كل ما عليك أنك تعرف عدد الأشخاص اللي هـ يكونوا موجودين بالتقريب وشكّل في أنواعها وأنت بـ تطلب والكل هـ ينبسط.

بعد نجاح نولا Nola CupCakes أول محل متخصص في الكب كيكس، انتشرت آلاف المحلات اللي بـ تعملها، مش بس كده، ده كمان محلات الحلويات اللي بقى لها كثير في مصر زي لا بوار بدأت تعمل كب كيكس، لييندا كب كيكس أو Leyenda CupCakes في الزمالك واحد من المحلات الجديدة اللي بـ تجرب حظها في موضوع الكب كيكس ده.

المحل من بعيد لا يوحي تمامًا أنه له علاقة بالمخبوزات أو الحلويات -لسبب ما تخيلنا أنه محل ساندويتشات سريعة وشاورما- لأن لا واجهة المحل أو اللوجو لهم علاقة بجو الكب كيكس المعتاد… واجهة زجاجية فوقها الاسم بحروف معدنية تحتها إضاءة خضراء، يمكن الشيء الوحيد اللي ممكن يوحي بوجود علاقة بالحلويات هي شخصية m&m’s المشهورة Red، والموجودة بالحجم الطبيعي جانب باب المحل.

أول ما دخلنا لاحظنا أن المكان بالرغم من أن مساحته صغيرة، إلا أن ناقصه الكثير من التفاصيل علشان يكون له شخصية مميزة. مافيش حاجة علقت بذهننا في المكان غير ثلاجة فيها تورتتين على الشمال وأنت داخل، وثلاجة في الواجهة فيها عدد محدود من الكب كيكس… ده غير كتابين على رف مع تمثال صغير لنفس الشخصية اللي لسه قائلين عليها فوق.

نحب نوضح أن وقت الزيارة كان على الساعة 7 مساءً مثلًا فمعظم الأنواع كانت خلصت -قلنا دي علامة مبشرة الكب كيكس عنده بـ تتخطف-  فقررنا أننا نجرب الموجود وكان الآتي: شوكوليت فادج، وأوريو، وبلوبيري شوكوليت وكاروت كيك وفيريرو روشيه (11 جنيه للواحدة) وRed Velvet Cake Pops بـ 5 جنيه).

مبدأيًا، وبلا استثناء الكيك في كل الأنواع بـ يعاني من الجفاف، مش عارفين ده عيب في الصنع ولا التخزين، أيًا كان السبب النتيجة كانت مؤسفة. برضه من المشاكل الأساسية للكب كيكس أنها باختلاف أنواعها مالهاش طعم، باستثناء كب كيك الجزر واللي كانت غنية بالقرفة بدون أي أثر للجزر… ماعدا قطعة متغطية بالجيلاتين للتزيين، والبلو بيري كب كيك اللي عجينتها كان طعم الـ Syrup واضح جدًا فيها.

ما فضلش غير أننا نتكلم عن الفروستينج، واللي كان دهني جدًا لدرجة أنه بـ يسيب طبقة دهنية على شفايفك بعد ما بـ تأكله، سواء Cream Cheese أو شوكولاتة. عجبنا Cream Cheese  الأوريو بقطع البسكويت اللي فيه، وفروستينج الشوكولاتة اللي على كب كيك الفيريرو روشيه لأننا نعتقد أنه نوتيلا، بعكس الشوكوليت فادج واللي كان خفيف جدًا وطعم زبدة الكاكاو واضح جدًا فيه.

كان نفسنا نقول أن الـ Red Velvet Cake Pops عجبنا، للأسف لأ، المشكلة أن المرة دي عجينة الكيك كانت دهنية جدًا… مافيش وسط، يا إما دهنية يا إما جافة، وبعدين الـ Red Velvet بالنسبة لنا الفروستينج الكريمي… واللي للأسف كان صلب ودهني.

لييندا لسه في مرحلة الـ Soft opening، ودي مرحلة هائلة جدًا لإعادة النظر في حاجات كثيرة، لأن غير كده المكان مش هـ يقدر ينافس وخصوصًا أن الزمالك فيها كم من محلات الكب كيكس الممتازة.