The Definitive Guide to Living in the Capital , Cairo , Egypt

عشاق الشوكولاتة ما يقدروش يستغنوا عنها مهما يحصل ويقدروا يفرقوا بين الشوكولاتة اللي تعلي المزاج والشوكولاتة الأي كلام واللي عاملينها سد خانة ومسمينها شوكولاتة وهي نوع رديء من الكاكاو الرخيص، لكن المكان اللي هنتكلم عنه النهارده هو مركز الشوكولاتة الراقية اللي تاخدك معاها  في رحلة لعالم جميل ما تفوقش منه إلا بعد ما تخلص كل جرعة الشوكولاتة اللي هتشربها أو تاكلها كاملة.

أنواع الشوكولاتة هناك سواء شرب زي الهوت شكوليت أو اللي  chocolate spoonأو  لو هتجرب أكل زي الوافلز والبروانيز والمولتن كيك حاجة كده ما تتوصفش  تتاكل بس.

طلبنا Milk chocolate Bomb بـ 92 جنيه و Milk chocolate spoon بـ 32 جنيه مع إضافة لبن 7 جنيه، وموخيتو 28 جنيه، وكابتشينو 31 جنيه، وأميركان كوفي  بـ 28 جنيه.

الـ Milk chocolate Bomb دي عبارة عن كورة شوكولاتة جواها آيس كريم فانيليا، وبيتحط عليها صوص كراميل سخن بيدوب الشوكولاتة ويخليك تستمتع بأجمل ميكس آيس كريم مع شوكولاتة مع كراميل. لدرجة إننا نسفنا الطبق نسف.

أما الكابتشينو والأمريكان كوفي فكانوا مظبوطين وتمام جدًا نسبة القهوة فيهم مع اللبن زي ما الكتاب بيقول، برضه الموخيتو كان منعش جدًا ومناسب مع الشوكولاتة لأننا تعبنا من كترها خاصة بعد ما جربنا الـ  Milk chocolate spoon واللي هو عبارة عن مكعب شوكولاتة سويسري باللبن، بيتحط مع لبن سائل ويدوب وتشرب أجمد شوكولاتة في التاريخ فيه منه أنواع تانية بالبرتقال أو النعناع بس إحنا اختارنا العادي، ومن وجهة نظرنا هو كان محتاج كمية لبن أقل علشان نحس بالطعم أكتر.

تجربتنا هناك ما تتنسيش وأكيد مش هتكون المرة الأخيرة للملاذ الأول والأخير لعشاق الشوكولاتة.