The Definitive Guide to Living in the Capital , Cairo , Egypt

دايمًا في الصيف بنبقى محتاجين مكان مختلف، وجو كويس، ومن هنا بدأنا رحلة بحث عن مكان بالمواصفات دي، وبدون معاد، الصدفة ودتنا لكافيه اسمه “Huts” في المعادي، قلنا نجرب، وجينا النهارده ننقل لكم تجربتنا معاه.

مبدئيًا كده، المكان أول ما تدخله هتشم ريحة مبهجة، والتكييفات عاملة جو حلو ولايق جدًا مع الديكورات اللي فعلًا مختلفة ومش زي أي مكان تاني، والقعدات فيه مقسومة لجزأين، الجزء الأول عبارة عن برجولات يمين وشمال، وبينهم ممر بيدخلك على الجزء التاني، واللي هو عبارة عن كنب مريح، وفيه شاشات متوزعة لكل ترابيزة.

لما تقعد في المكان مش محتاج تنده أو تدور على حد من الخدمة، علشان عندهم جهاز نداء آلي على كل ترابيزة، تقدر تضغط عليه علشان يجيلك حد من المكان يشوف انت محتاج إيه، أو تضغط على طلب الفاتورة، علشان يجيب لك الحساب وهو جايلك، ولو لقيت إنك استعجلت في قرارك، تقدر تدوس على إلغاء علشان محدش يجيلك.

في البداية قلنا نجرب العصائر، وطلبنا عصير برتقال (30 جنيه) وكان فريش جدًا وطعمه مش مرر، وحجمه كويس جدًا على سعره، بعدها طلبنا سموزي بطيخ (45 جنيه) وإذا بالمفاجأة إننا مقدرناش نكمله لأنه كان سموزي بجد، وساعتها اتعرض علينا إننا ناخده “تيك أواي” وعلى سبيل التجربة وافقنا، وكانت تجربة ناجحه وبنشجعكم تجربوها.

بشكل عام الخدمة في المكان ممتازة، والناس في الخدمة كلها مبتسمة دايمًا وبيرضوك لأقصى درجة، ودي حاجة نادرة اليومين دول، علشان كده بننصحكم تروحوا تجربوه، واحنا متأكدين إنكم مش هتندموا.

وبالمناسبة طبعًا عندهم فطار ووجبات وحلو، بس ملحقناش نجرب كل دا للأسف، لكن أكيد هنجربه في زيارة تانية قريب.